人人都說媽媽好 特區官僚最不孝
愛是一條小小的絲帶，母親用皺紋輕輕繫着。母親節雖然過咗，太一叮今日依然向天下母親致敬，因為無微不至嘅無私母愛實在太偉大太感人嘞。尤其喺香港為人母者，養兒育女嘅艱辛自從臨盆一刻嘅十級痛楚之後未停過，年復年咁苦撐住，真係皺紋都多幾條，擔子都多幾斤o架。
嗱嗱嗱，尋日母親節百幾名媽媽拖男帶女上街，唔係去飲茶，唔係去睇戲，而係去示威，抗議託兒服務天殘地缺，搞到香港父母處境艱難。最搶眼嘅係印住黑色康乃馨嘅示威牌，象徵「不要虛偽的母親節」。佢哋鬧得啱o架，官老爺一邊話祝全港媽媽母親節快樂，一邊對基層港媽嘅愁苦視而不見，根本就係虛偽！
講到官老爺嘅忤逆行徑，示威媽媽隆重推介一名代表人物，前特首曾蔭權爵士。無錯，就係因為貪曾下巴輕輕，令無數母親一生遺憾，事關佢仲未做「痛心特首」、仲做緊政務司司長嘅時候，已經煞有介事叫市民努力造人生夠三個，點知講完之後不負責任，乜嘢支援政策都無，害到唔少媽媽裙拉褲甩進退兩難。
示威者陳太就係受害例子，三名子女年齡分別由十一個月大至八歲，丈夫任職酒樓，每月賺八、九千蚊，生活捉襟見肘。陳太見丈夫擔子沉重，本來想外出工作幫補家計，無奈三名子女無人照顧，求助託兒中心咩，資助嘅配額少到輪唔到，私家嘅收費貴到畀唔起。結果陳太一家困境無法打破，就算睇住大兒子成績追唔上，都無能力給予一個外出補習改善學業嘅機會，你話做父母嘅係幾咁難受吖。
話時話，支援政策不足害到港媽愁眉深鎖嘅何止係託兒服務。喺忤逆官僚施政之下，香港為人母者真係少啲堅毅都撐唔落去o架。嗱，十月懷胎驚無床位生仔，嬰孩嗷嗷待哺驚無奶粉應市。好嘞，到子女牙牙學語嘞，又因為十五年免費教育遲遲未落實而驚子女輸在起跑線上。當然啦，養兒一百歲，長憂九十九，如果閣下夠長命，仲隨時因為全民退休保障遙遙無期而擔心子女老來無依。
世上只有媽媽好，可恨官僚太無情。貪曾禍港七年，貧苦媽媽未嘗過一個真正無憂無慮嘅母親節，今屆政府如果真係想基層媽媽快樂，係咪好應該盡番少少義務呀？係咪應該增加託兒服務呀？係咪應該盡快落實十五年免費教育呀？
母親平凡又偉大，永遠係兒女心中真正嘅英雄，太一叮再向全港母親致敬，叮！
