政壇：搞搞政：墊支助理長服金 象哥隨時唔見錢
設計圖片及對白
立法會議員酬金及工作開支償還款額小組委員會尋日開會，進出口界議員「象哥」黃定光提出申請結束辦事處津貼嘅疑問。佢話議員卸任後通常都會有筆實報實銷嘅津貼用作支付助理遣散費，但如果助理中途唔撈或退休，佢就要即時墊支一筆遣散費或長期服務金，佢建議政府政策應該靈活啲，唔使等議員落莊先攞到錢。
設計圖片及對白
象哥之所以咁緊張，皆因佢有位年屆六十五歲嘅助理，已幫咗佢兩屆任期，長期服務金計落有成六位數字以上，即係佢要墊支一個月酬金都唔止。但最大問題係，象哥墊支呢筆錢，係咪容許喺卸任後申領，行政署都唔敢講實。
對於象哥建議提早申領部分結束議員辦事處津貼，行政署署長蔡潔如就「耍太極」話要再研究，但佢同時強調議員助理中途自行辭職係唔使支付長期服務金嘅。此話激到象哥紮紮跳，佢話自己守法、政府都應該守法︰「如果政府唔改政策，呢筆帳記到我執笠落莊都要攞番，我可以JR（司法覆核）佢，潮流咁興司法覆核！」
其實議員助理薪酬已一向被指偏低，如果連長期服務金都話要等到議員卸任後先支付，就真係冇陰功喇！
