公園限用揚聲器 平民娛樂何處去

話說近年有唔少曲藝團體喺公園唱歌，自娛娛人，可惜由於聲量過大，經常被投訴滋擾，甚至同市民爆發衝突。有鑑於此，康文署向律政司建議，全面限制喺全港一千五百幾個公園、遊樂場地及休憩處使用大型揚聲器，以求減低噪音，紓緩聲浪對鄰近居民嘅影響。

即係咁，娛樂還娛樂，每個人都有唱歌嘅自由，但必須記住，自己嘅自由唔能夠妨礙到其他人嘅自由，否則就唔係叫娛樂，而係擾人，咁就隨時出事嘅喇。呢，因為噪音滋擾而引起嘅衝突幾乎無日無之，而且愈來愈激添。幾年前，屯門公園甚至發生老人家畀康文署人員追截而暴斃嘅慘劇，娛樂變成搞出人命，都咪話唔可悲。

所以呢，當局建議限制喺公園使用大型揚聲器，都無可厚非嘅。不過咁，噪音降低，唔等於問題會消失，如果當局矯枉過正，趕盡殺絕，曲藝團體冇場地表演咯喎，歌迷谷住一肚氣，隨時爆大鑊o架。

正所謂，有頭髮邊個想做瘌痢吖。曲藝團體之所以被迫喺公園表演，皆因適合平民百姓嘅文化表演場地嚴重不足，唔喺公園表演，仲可以去邊度呢？

其實，雖然香港地少人多，但未至於連畀市民唱歌娛樂嘅地方都搵唔到，事在人為嘅啫，睇下外國、內地或者台灣，基層文化藝術活動因地制宜，做得有聲有色，皆大歡喜，點解人哋做得到，香港就做唔到呢？講開又講，香港唔係冇表演場地，康文署轄下場館使用率低得可憐，有啲連三分一都唔到，一方面有場冇人用，一方面有人冇場用，呢啲咪就係官僚失職，管理混亂嘅結果囉。

歸根究柢，港府發展文化藝術一貫功利先行，根本冇考慮基層市民需要。官僚好高騖遠，搞咗個不倫不類嘅西九文化區，以為興建幾個場館，就可以打造成世界級嘅文化藝術樞紐，結果搞到依家仲係十畫未有一撇，簡直貽笑大方。

計太一叮話齋，如果將西九文化區嘅二百幾億元用嚟改善社區設施，為曲藝團體提供表演及娛樂嘅場地，就唔使搞到噪音滋擾，衝突不斷喇，叮！