SUN潮語【巧京京】

潮語「巧京京」嘅意思就即係「好驚驚」，如果你用廣東話去讀「巧京京」就會讀成「好驚驚」嘅變音，效果就好似啲廣東話講唔正嘅大陸人士讀出「好驚驚」一樣。要注意嘅係重疊嘅「京京」並唔係代表好驚嘅意思，而只係令到成件事懶可愛，所以「巧京京」通常只係用嚟撒嬌，並唔係真驚，係女性使用較多。不過，「巧京京」亦有另一個用法，就係當反話用，即係反過來表達完全唔驚嘅意思。例如打算出去和平示威但遇到愛港力挑機，對方聲言話要晒馬搗亂，你大可以回一句「巧京京喔！」來恥笑對方，表達「放馬過來」嘅意思。

SUN潮語【巧京京】

民運歌曲《自由花》有一句：「但有一個夢不會死記着吧！無論雨怎麼灑，自由仍是會開花！」雖然歌係咁唱，但剛過去嘅六四廿四周年燭光晚會，就喺一場突如其來嘅暴風雨中腰斬。當十幾萬市民無懼大雨依然堅守喺維園點起燭光，堅持悼念廿四年前倒在京城血泊中嘅英靈，銅鑼灣附近依然有市民，抵着無情雨舉步維艱都要走入維園宣示港人良知之際，主辦單位支聯會突然喺八點四十五分宣布大會提早結束！於是奇怪事情發生，本來漫天風雨竟然變成絲絲細雨，到底係咪有人作法招風雨，阻止燭光晚會？隨後，網上一直叫人唔好去維園紀念六四嘅城幫本土派國師陳雲，就喺面書上寫話今年係大雨淋邪神，出年就五雷劈祭壇！嘩！「巧京京」呀！

「巧京京」最初係出現喺網上討論區，可能因為近年中港族群矛盾增多，大家互相口角得多，你一句我一句，港人嘈到要報警，而大陸人通常不甘示弱地回應：「爆警囉……禍巧京京呀！」聽得多就傳咗上網，再傳番去現實世界都不足為奇。最奇嘅係，最近有人出席完李旺陽追悼晚會，並曾與到場搗亂嘅愛港力人士口角之後，就被幾條大漢襲擊，真係「巧京京」！

第一手消息請下載on.cc東方互動iPhone/iPad/Android/Windows Phone Apps