食署補鑊執法 最怕虎頭蛇尾

希望真係咁喇。話說食肆阻街，滋擾居民，影響環境衞生，情況愈來愈嚴重，搞到申訴專員公署亦睇唔過眼，狠批食環署監管不力，執法兒戲，變相縱容食肆違規。食署認衰承諾改進，近日密密出招補鑊，又成立特遣隊，加強巡視阻街黑點，又話準備推出辣招，加強執法喎。

所謂辣招，包括喺指定時間內，拒絕接受因違規擴展營業範圍被釘牌嘅食肆持牌人再申請牌照，甚至會向法庭申請封閉食肆，唔准開檔等等。嗱，似模似樣，深水埗東京街一間曾多次因非法霸街被檢控，並兩次被法庭罰款嘅食肆，日前終於被罰停牌十四日。

亡羊補牢，未為晚也。食環署以往懶懶閒，吊吊揈，有法不依，執法不嚴，搞到食肆霸街愈來愈猖狂；家陣祭出辣招補鑊，遲到好過冇到，總好過翹埋雙手乜都唔做嘅。不過咁，辣招唔係得把口噏，亦唔係靠一兩次行動就可以收效，一定要持之以恒，貫徹始終，如果又係好似以前咁，有頭威冇尾陣，只得三分鐘熱度，隨時爛尾收場嘅咋。

講開又講，港產官僚最叻做騷，平時唔做嘢，臨急抱佛腳，風頭一過，依然故我，已屢試不爽喇。好似「清潔香港」咁，○三年沙士之後，成班高官大鑼大鼓表演掃街大龍鳳，揚言掃晒全港幾十個衞生黑點。點知疫情一過，舊觀再現，後巷繼續堆垃圾，橫街繼續積污水，香港繼續變臭港，衞生黑點簡直仲黑過以前。最近新型禽流感殺到埋身，當局重彈舊調，高官齊齊落街大掃除，舊騷重做，裝模作樣，都唔知好嬲定好笑！

講番食環署加強掃蕩違規食肆呢筆，睇怕都係虎頭蛇尾居多，正如該署滅鼠一樣，試問有邊次成功吖。係人都知，本港鼠患嚴重，鼠蹤隨處可見，試過有外籍女遊客光天化日下喺中環畀老鼠咬傷腳，搞到香港個朵臭晒。每次爆出老鼠咬人醜聞，食環署循例加派人手滅鼠，但唔使幾耐就關人個關，有乜法子唔老鼠惡過人吖。話時話，貪曾及貪湯呢啲官倉老鼠，可能就係咁樣養大嘅咋。

咪話太一叮唔提醒吖，呢次食環署對付霸街食肆如果又係敷衍了事，辣招變虛招，萬一發生火警，搞出人命，睇你哋又點樣補鑊，叮！