貪曾貪湯一丘貉 不容廉署大細超
出得嚟行，預咗要還，已經成為官場蠱惑仔嘅政治詛咒。前廉政專員湯顯明就係人辦，任內不廉不潔敗壞官威，卸任即刻身敗名裂極速折墮，居然由堂堂廉署一哥淪為貪腐嫌疑犯，從此臭名遠播人人喊打，貪埋咁多茅台干邑都無用，一鋪嘔凸。
貪湯成為香港開埠以來首名被刑事調查嘅「不廉專員」，絕對係罪有應得嘅。廉政同法治係香港最珍貴嘅核心價值，就好似眼睛容不下一粒細沙，但係近年官場泥沙俱下，貪官污吏篤眼篤鼻。前特首曾蔭權爵士已經「曾商勾結」，前政務司司長許仕仁又涉嫌以權謀私，家陣連前廉署一哥都係貪婪之徒喎，咁仲得了嘅？嗱嗱嗱，淨係睇貪湯一連衰兩鑊，先喺長洲飄色巡遊變眾矢之的，再喺立法會成為眾「恥」之的，就知市民對呢股官場貪風幾咁深惡痛絕啦。
咦，唔啱數，既然貪官係人民公敵，點解廉署放軟手腳，只打烏蠅，唔打老虎呢？係人都知，貪曾禍港七年狂貪暴舔，貪腐問題同貪湯如出一轍，甚至有過之而無不及，廉署既然高調對付貪湯，居然至今未依法處理貪曾，點都講唔通啦。廉署只查貪湯，唔捉貪曾，等如警方浩浩蕩蕩犂庭掃穴，只係拉啲小嘍囉，反而將大奸大惡之徒放走晒，荒唔荒謬啲呀？
所以咯喎，「東方報業民意調查」顯示，廉署查貪官曾湯有別，四成七受訪者批評不合情理；兩成六斥涉選擇性執法；兩成一更質疑當局想轉移視線，放生貪曾。對於貪曾仍然逍遙法外，四成六受訪者直指廉署欠公眾一個交代；兩成六認為事不尋常；兩成三指事件勢必損害廉署聲譽。
即係咁，貪湯被視為貪曾愛將，唔止貪婪手法同出一轍，就連為醜聞解畫嘅「扮哭無淚」嘴臉都成個餅印，官場蠱惑仔同撈同煲一齊搵食，廉署喺貪湯年代放生貪曾一啲都唔出奇。但係家陣廉署都換咗當家啦，查貪曾仲係軟手軟腳無晒下文，唔通廉署塊招牌真係生晒銹？嗱，你唔好話畀太一叮聽，廉署已淪為狼狽為奸嘅蠱惑仔樂園，香港嘅廉政同法治真係會玩完！
調查又顯示，四成二受訪者要求廉署公開交代對貪曾嘅調查同結果；兩成七認為貪曾貪湯關係千絲萬縷，廉署應該同步調查；兩成六認為貪曾調查絕對不能不了了之。
咁講啦，貪曾貪湯一丘貉，不容廉署大細超。廉署如果唔想變成下年飄色巡遊嘅眾矢之的，快啲肅貪懲奸，將貪曾貪湯一齊繩之以法，叮！
