濫用公帑考大狀 衞署官僚太荒唐
打工仔向老闆申請放假一年，期間糧照出，仲要一分錢都唔少，你估有無可能吖嗱？大家一定會話，發夢就得，天下間邊有咁大隻蛤乸隨街跳吖。嗱，唔係太一叮大話西遊，真係有咁大隻蛤乸隨街跳，只不過可以享受呢隻蛤乸嘅唔係一般打工仔，而係港府高官啫。
呢位超級打工仔係衞生署一名助理署長級女醫生，佢被踢爆上年十一月起獲批一年進修假期，以便做實習大律師同獲取執業資格，期間唔使上班，居然獲支全薪，涉款一百六十萬元。簡單講，即係白人工一年，問你服未。唔怪得有人話，港產官僚食嘅係港式大鑊飯，做又三十六，唔做又三十六啦。
所謂無功不受祿，雖然掛名話進修，但始終係放緊假，而且一年咁長，港產官僚面皮夠厚白人工，納稅人都唔肯啦，衞生署咁都批准，仲唔係有病？難為食衞局局長高永文仲死撐，話部門首長有權因應實際需要，按規定安排員工培訓，做法適合，又話衞生署前線人員執法屢遇挑戰，部門內有法律知識專家，有助運作喎。
簡直狡辯！如果按照高永文咁講，港府仲要律政司嚟做乜？再講喇，呢位所謂大狀嘅實習時間只係一年貨仔，講句唔好聽，根本同新丁無分別，最終咪又係以律政司意見為依歸，衞生署咁做完全係多此一舉。仲有呀，面對法律問題嘅部門唔係得衞生署一個，如果漁護署、食環署、海事處以及警務處等部門有樣學樣，個個帶薪進修，政府開支咪變成無底深潭？
咪話太一叮踢爆，放假一年支全薪，栽培人才係假，濫用公帑、假公濟私就真。試諗吓，此例一開，衞生官僚以後可以排隊放假進修，由公帑供養考取專業資格，可能連揸飛機都可以考，幾爽呀！唉，鬼叫官官相衞咩，你批我放假白逗人工，我保你有事唔使問責，呢啲咪叫狼狽為奸囉！
都係嗰句啦，禮崩樂壞，綱紀廢弛，政府仲邊有規章制度可言吖。話時話，納稅人啲錢真係花得冤枉o架，唔係供養前特首曾蔭權爵士周遊列國歎世界，就係供養前廉政專員湯顯明飲酒送禮；唔係用嚟幫貪曾嘅爛尾工程填氹，就係畀港產官僚用嚟享受各種超筍待遇。港府請客，納稅人埋單，早就見怪不怪，今次醜聞只係冰山一角嘅咋。
無論點都好喇，衞生署慷納稅人之慨，必須有個交代。嗱，署長陳漢儀，將功補過又好，亡羊補牢又好，再唔撥亂反正，你最需要嘅唔係進修，而係大修呀，叮！
