孔雀石綠再現 毒魚死灰復燃

內地傳媒日前揭發，中山驚現孔雀石綠淡水魚，消息一出，唔只民眾擔心禍從口入，連中山市政府都驚禍從天降，急急補鑊進行抽檢。嗱，抽檢結果出咗嘞，十二個抽檢樣本中，四個孔雀石綠指標唔合格，即係話，孔雀石綠毒魚又捲土重來喇！

更令人擔心嘅係，孔雀石綠來歷不明，要搵出毒源並唔容易。內地當局係咁講嘅，問題魚喺養殖、運輸、銷售等環節依然存在疑問，即使檢驗結果顯示有違禁藥物，但究竟來自邊個環節，追查存在困難。嗱嗱嗱，咁就大鑊啦，連邊個落毒都唔知，點樣防止毒魚流出呀？

內地黑心食品五花八門層出不窮，孔雀石綠舊橋翻炒，唔係代表奸商黔驢技窮，只係代表佢哋良知泯滅。係人都知，孔雀石綠可以致癌，可以令胎兒畸形，用咁毒嘅化學品養魚，再賣畀人食，同慢性殺人有乜分別？

講到呢度，太一叮開始擔心，孔雀石綠播毒廣東，香港會唔會又被殃及池魚o架？大家應該記憶猶新，當年香港驚現內地入口孔雀石綠毒鰻魚，點知港產官僚反應遲鈍，後知後覺，係咪有毒魚流入本地唔知，係咪要將孔雀石綠列入有害物質名單又唔知，旨意佢哋把關，蛇都死喇！

講開又講，當年嘅衞福局局長周一嶽口沒遮攔，話要食幾百公斤孔雀石綠魚至會有問題，被全城鬧爆。家陣周一鑊已經滾蛋，太一叮希望把關官僚吸取教訓，唔好再渾渾噩噩，畀黑心食品流入，害到市民寢食難安。你知啦，周一鑊在位八年，唔只搞到食品安全問題百出，仲搞到公立醫院亂象叢生，醫療事故無日無之，市民一旦因為食錯毒魚而入院求診，隨時愈醫愈大鑊嘅咋。

孔雀石綠現廣東，最怕把關又甩漏。內地黑心食品真係睇漏一眼都唔掂o架，搞到內地同胞寢食難安嘅何止孔雀石綠魚，仲有劣質蠔。北京有店舖將藏污納垢嘅舊蠔殼盛載價錢平一截嘅冷藏蠔肉，然後當新鮮生蠔出售牟取暴利。內地無物不假，無食不毒，香港人睇漏一眼都分分鐘中招呀！

總言而之，港產官僚把關不容有失，如果又害到市民陷入食品危機，唔該你哋陪孔雀石綠一齊消失啦，叮！