立會三審走過場 惟有重典治貪湯
一不離二，二不離三，前廉政專員湯顯明尋日第三度出席立法會政府帳目委員會聆訊，話就話就佢嘅連串貪腐醜聞接受議員公審，其實佢重施故技，唔係狡辯，就係迴避，根本死不悔改。睇嚟立法會嘅聆訊姿勢多於實際，要對付貪官，始終要靠嚴刑峻法。
貪湯醜聞愈揭愈多，愈揭愈臭，巧立名目以權肥私、呼朋喚友大吃大喝、豪花公帑遊山玩水、公款送禮唔豪唔送、收受禮物多多益善等等，簡直無奇不有，同內地貪官有得揮(口架)。嗱，淨係飲酒就令人嘆為觀止，貪湯五年任內，廉署總共買咗成千支酒，而唔係之前廉署文件所講嘅三百幾支，其中直屬貪湯嘅行政總部所購入嘅酒就多達六百支，辦公室幾乎變成私家酒窖，難怪貪湯被稱為「千杯不醉」，佢仲狡辯指平均每個月兩支烈酒唔算多喎。叮，佢究竟係廉政專員，定係品酒專員吖！
仲有吖，貪湯承認任內曾五次帶埋女友出席廉署飯局，僅一次有畀錢，而且試過外訪時提早兩日同女友去旅遊。你話喇，咁仲唔係假公濟私？
最令人側目嘅係，貪湯任內，廉署曾接受內地最高人民檢察院贈送嘅價值廿萬元屏風，佢聲稱呢啲係「濃情厚意」喎。正所謂，禮尚往來，廉署收得人哋咁貴重嘅禮物，自然要買同樣貴重嘅禮物回送對方，唔怪得貪湯任內瘋狂送禮，淨係買禮物就使咗成百萬公帑喇。
係人都知，港府對公務員收受禮物嘅金額有嚴格限制，收取貴重禮物，唔止違反規定，更加隨時觸犯法例添。做咗幾十年公務員嘅貪湯居然覺得收受人哋嘅「濃情厚意」係理所當然，受之無愧，簡直離晒大譜。身為肅貪倡廉嘅最高官員，貪湯冇以身作則不特止，仲將內地官場嘅陋習搬來香港，搞到烏煙瘴氣，唔只令廉署招牌蒙污，而且損害香港廉潔形象，話佢係香港嘅千古罪人，一啲都冇誇張。
事實證明，對付貪湯呢啲無恥之徒，立法會聆訊等於為佢提供狡辯機會，根本無濟於事。講到底，治亂世用重典，治貪官用狗頭鍘，廉署要重建聲譽，挽回形象，必須加緊刑事調查，將貪官繩之以法，否則，如果又好似調查貪曾咁，一拖再拖，香港核心價值遲早崩塌嘅咋，叮！
