假消毒真馬虎 防疫症太兒戲

太一叮所講嘅唔係虛幻世界，而係恐怖現實。本港正面臨禽流感同新沙士雙重威脅，惡菌兵臨城下，點知當局抗疫居然虛應故事，尤其康文署轄下多個展覽場館防疫措施形同虛設，「假消毒、真馬虎」，令人擔心一旦惡菌入侵，隨時重演十年前沙士悲劇。

政府前排高調搞乜嘢「全城清潔運動」，原來又係有頭威冇尾陣。本報記者最近巡查咗多個位於旅遊熱點嘅展覽館，發現呢啲人流高度集中嘅場所清潔消毒普遍「裝假狗」，市民一個唔覺意隨時中招。所以話，政府靠得住，豬乸會上樹，真係冇講錯。

最奇怪嘅係，呢啲場館由康文署管轄，但消毒指引就各個場館各自為政，各適其適。呢嗱，香港藝術館規定每日消毒八次，但同區嘅香港文化中心就只做四次。唔通惡菌喺藝術館殺傷力會勁啲？喺文化中心就弱啲？香港就話實行「一國兩制」啫，點知連防疫都一地兩制，你話係咪九唔搭八吖。

本來呢，有消毒好過唔消毒，可惜原來所謂指引只不過係一紙空文，根本冇按本子辦事。嗱，以文化中心演藝大樓為例，明明寫住出入口扶手每日消毒四次，升降機按鈕約每小時消毒一次，但記者喺現場逗留咗幾粒鐘，根本見唔到清潔工人消毒。唔怪得人哋話，信佢一成，雙目失明，港產官僚真係信唔過。

就算依足指引準時消毒，都係求其過求其，是是但但嘅咋，殺唔殺到菌話之你。最得人驚就係，抹門淨係抹玻璃，最容易積聚病菌嘅門柄居然抹都唔抹，咁搞法唔止離譜，直頭係靠害添喇。

當年沙士肆虐，當局聲稱病毒可以生存三小時，公眾地方要定時消毒，減低受感染機會。但傳染科專家就指出，近排肆虐中東嘅新沙士病毒，喺適合嘅溫度同濕度下可以生存三日甚至一周。當局冇因時制宜，修訂指引不特止，消毒仲偷工減料，簡直係攞市民生命安全較飛。

正所謂，預防勝於治療。港府清潔以假當真，消毒似有若無，抗疫防線隨時崩潰。車公靈籤早就提醒港人，今年「宜慎小人，凡事不利」，唔通真係好嘅唔靈醜嘅靈？有時唔到你唔信邪o架，市民最好自求多福吖！