區會工程無王管 亮點隨時變污點

呢，政府年初公布為全港十八區區議會各預留一億元，喺區內籌建所謂「社區亮點項目」。每區最多可做兩個項目，每項工程費至少三千萬元，被區議員形容為「史上最大撥款」。不過咁，當各區正紛紛研究點樣運用呢筆意外之財時，外界就擔心亮點工程隨時淪為浪費公帑嘅污點工程。

呢啲擔心絕對唔係杞人憂天，浪費公帑一向係港產官僚嘅強項，如果唔(目及)實啲，隨時重蹈地區小型工程撥款嘅覆轍，揼錢落海嘅咋。

所謂地區小型工程，係指政府○八年起下放權力，每年撥三億元畀十八區區議會，自行審批改善地區設施嘅小型工程。點知好心辦蠢事，浪費十幾億元公帑不特止，更留低一大堆不倫不類嘅「政績工程」獻世。

呢嗱，荃灣區議會使咗七十萬元整咗個鵝形雕塑，話新地標更能夠突出「深井燒鵝」嘅地區特色喎。結果搞出個鵝唔似鵝、鴨唔似鴨、雞唔似雞、鴿唔似鴿嘅「四不像」，市民有彈冇讚，同近排熱爆維港兩岸嗰隻大黃鴨相比，簡直差天共地。人哋係創意，你哋就出醜，乜架都丟晒喇。

除咗騎呢地標，仲有古怪擺設。元朗區議會喺天水圍公園搞咗個「藝術雕刻廊」，共有十座雕塑，連埋地台、介紹板同照明系統，大拿拿使咗一百二十萬元。點知曲高和寡，本報記者喺現場觀察，成粒鐘都冇人停低腳步欣賞，睇怕呢筆公帑又係使得冤枉咯。

文化藝術唔掂，體育設施同樣濕滯。元朗區議會喺新田興建咗個足球場，啟用三年有多，冷冷清清，拍晒烏蠅，就算免租都冇人吼。何解？原來球場起到冇雷公咁遠，周圍仲堆滿貨櫃，最攞命連廁所都冇，人有三急唔想就地解決，就要來回廿分鐘去最近嘅公廁，你話係咪嘥氣吖。

講番亮點工程呢筆，每區一億元話多唔多，話少唔少，都係納稅人嘅血汗錢。最荒謬嘅係，有區議員居然提議喺大埔海濱增設英軍戰艦，日日表演洋人侵略香港嘅歷史。國恥當榮耀，如果咁都得，就真係國際大笑話咯。

咪話太一叮唔提醒吖，無論係小型工程，抑或亮點工程，政府都要好好把關，嚴格審批，否則，納稅人遲早會同你哋算帳，叮！