人無千日好，花無百日紅。近年香港唔知交上乜嘢霉運，社會爭拗不斷，家嘈屋閉，連港人引以自豪嘅競爭力亦應聲下跌。呢，前排瑞士洛桑管理學院公布嘅全球競爭力排名，香港由去年嘅第一位急挫至第三位，創下近五年來排名新低。動感之都風光不再，到底應該怪邊個？

萬事皆有因，科大經濟學系主任雷鼎鳴嘗試為香港把脈，指香港競爭力每況愈下，固然同貧富懸殊、社會流動性低、樓價高企及政府弱勢有關，但更令佢擔心嘅係香港內耗不斷，排斥內地一切，萬一香港市民走向極端，切斷與內地所有聯繫，香港經濟將會崩潰，當外匯儲備及市民積蓄用光，樓價就會暴跌九成，香港亦會玩完咁話！

人無遠慮必有近憂，雷教授之言未必係危言聳聽o架。事實上，香港政治內耗無日無之，民主派、建制派、愛港派、本土派接力登場，狗咬狗骨，混戰連連，搞到永無寧日，神憎鬼厭。而立法會就更加烏煙瘴氣，議員不務正業，唔係拉布就係對罵，社會陷入前所未有嘅分化。咁搞法，香港競爭力有乜法子唔一落千丈吖！

講開又講，近年出現以本土派包裝嘅港獨勢力，政治主張偏激，唔係要求同中國永久切割，就係妄想英國接管番香港，仲不斷高舉捍衞香港核心價值嘅旗號散播港獨言論，真係嚇死人。無錯，部分內地人質素低劣，加劇中港矛盾，但一竹篙打一船人並不公平。再講吖，今時今日中國係世界各地爭相招攬嘅通商對象，香港佔盡近水樓台嘅優勢，羨煞旁人，有乜理由因噎廢食呢？正如雷教授所講，中港經濟已有相當程度嘅融合，大家同坐一條船，香港跳船嘅話，等如自掘墳墓咋！

講真，中港矛盾愈演愈烈，內耗無休無止，港府要負上好大責任。就以限奶令為例，因為個別牌子鬧奶粉荒，港府就忙不迭立法，結果執法錯漏百出，賠上香港自由市場嘅美譽，唔止解唔開中港矛盾呢個死結，仲加劇兩地人民嘅對立情緒。咁都唔止，港府仲要搞港人港地立法添，容乜易被人質疑係經濟港獨吖，簡直唔衰攞嚟衰，叮！

嗱，近日中央官員頻頻示警，話香港嘅經濟民生愈墮愈後，唯獨喺政治方面「超前」，暗示香港再咁搞落去，老本遲早坐吃山空。求人不如求己，計太一叮話齋，港府弱勢無能，無良政客惟恐天下不亂，如果唔想坐以待斃，港人好應該自強不息，停止內耗，令東方之珠繼續發熱發光，係咪？

第一手消息請下載on.cc東方互動iPhone/iPad/Android/Windows Phone Apps