只見劏房千萬間 無殼蝸牛俱悲顏
源遠流長嘅廣東話言簡意賅，講出唔少書面語講唔清嘅東西。就攞一個「劏」字為例：劏人、劏客、劏死牛，點出大千世界嘅黑暗面。至於此地獨有嘅詞彙「劏房」，就道盡香港人嘅蝸居慘況──本來已經係「豆腐膶」嘅住宅單位，仲要左劏右劏一分為幾，貧苦大眾被迫縮膊屈膝，入住呢啲「豆腐碎」單位，你都咪話唔慘！
長遠房屋策略督導委員會公布最新調查，推算全港有接近七萬間劏房，住咗超過十七萬人，人均居住面積低至不足四十呎，居民一入屋就走上床，轉個身都有難度。接近一半劏房甚至連廚房、廁所及食水等基本設施都冇。
叮你個鎯鎯吖，眼見劏房普遍到呢種程度，嚴重到呢個地步，港府官員耍手擰頭唔肯評論，淨係話會根據有關數據制訂長遠房屋政策喎。難怪關注團體炮轟港府逃避現實，更質疑官方調查報細數，佢哋認為，全港劏房居民早已逼近三十萬大關，遠遠超過當局估計。
關注團體嘅質疑唔係無道理o架。首先，官方調查只係針對廿五年樓齡以上住宅樓宇，而今日香港嘅實況係，樓宇供不應求，基層一屋難求，唔止舊樓有劏房，工廈同商廈亦有劏房，仲有豬欄劏房、雞寮劏房、教堂劏房等等，千奇百怪。呢啲「特色單位」隨處可見，港府唔納入統計數據，根本就係掩耳盜鈴自欺欺人。
計太一叮話齋，無論劏房居民係當局統計嘅十七萬，定係關注團體聲稱嘅三十萬，對號稱國際都會嘅香港來講，結論都係「恥辱」兩個字。好事不出門，醜事傳千里，經過海外傳媒廣泛報道，香港劏房早就已經臭名遠揚。
細數劏房居民慘況，可謂一殼眼淚：一來，空間狹小危害身心健康；二來，易生摩擦不利家庭和睦；三來，劏房呎租直逼半山豪宅，租戶埋怨業主無良，不利社會和諧。最慘嘅係，部分劏房危機四伏，不時發生人命傷亡悲劇。
解決劏房問題嘅辦法係人都知，一言蔽之就係增建房屋。不過可惜吖，港府無能兼弱勢，官員上任時拍心口解決房屋問題，家陣就變咗頭耷耷狂呻「地從何來」，填海唔得、發展新界東北又唔掂……施政重中之重搞搞下變咗難中之難。
講到底，只見劏房千萬間，無殼蝸牛俱悲顏。房屋問題成為死結，社會怨氣愈來愈大，港府民望愈嚟愈低殘，太一叮只能講一句，無眼睇咯，叮！
