一場黑雨亂象多 不堪一擊嘆奈何
天災蹂躪，水浸道路，樹倒山塌，亂成一團……大家唔好誤會，呢個災難場面唔係發生喺受超強龍捲風吹襲嘅美國，而係被稱為福地嘅香港，問你服未。唉，只係一場暴雨啫，香港就搞到滿目瘡痍，亂七八糟，真係講都冇人信！
黑色暴雨之下，本港多個斜坡發生山泥傾瀉。
天文台尋日凌晨發出今年首個黑色暴雨警告，全港即時倒瀉籮蟹，水浸、塌樹、山泥傾瀉報告好似山洪暴發一樣未停過。好似秀茂坪一個工程地盤咁，因為排水不及而引發山泥傾瀉，數以噸計泥石如洪水般傾瀉而下，瞬間將多條行車線掩埋。好彩咋，當時無途人或者車輛經過，如果唔係，隨時又搞出人命都有之。
山泥癱瘓交通，而暴雨就圍困居民。新界多處地方例牌水浸，重災區天水圍田心村逾十間房屋無一幸免，家園變澤國，電器水上漂，你都咪話唔誇張。更誇張嘅係，連作為港九交通要道嘅紅磡海底隧道都成為水世界，恍如陸上行舟，唔知嘅仲以為真係潛入海底添。
一場黑雨，滿目瘡痍，香港好似落後地區咁，不堪一擊。嗱，截至尋日傍晚，當局總共接獲四十九宗水浸、四十一宗塌樹、十八宗山泥傾瀉報告，唔知嘅仲以為香港被龍捲風吹襲呀，叮！
年年暴雨，年年成災，香港成日自詡國際都會，實際可能連第三世界國家都不如，講出去都醜啦。陸上行舟又好，電器水上漂又好，呢類滑稽場面都唔係第一次嘅啦，港產官僚幾時至肯改善渠道工程，等市民唔使變災民呀？幾時至肯加快修葺斜坡，等市民風雨上路唔使擔驚受怕呀？咪話太一叮唔提醒，○八年一場黑雨奪去兩條人命，一○年同樣有兩名市民喪生於黑雨洪水之下，今年唔該港產官僚醒醒定定，唔好再害人害物嘞！
咁講啦，呢場黑雨就係香港管治亂象嘅寫照，港府風雨不斷，烏龍百出，管渠道嘅甩甩漏漏，管斜坡嘅一塌糊塗，管樹木嘅形同廢柴，香港人靠港產官僚遮風擋雨，不如自求多福好過。呢，公立醫院居然連換心臟手術都搞錯血型，港產官僚無心無肺無靈魂，香港又點可能唔風雨飄搖，亂七八糟吖！
不備難，難必至。颱風季節又到嘞，呢種泥漿管治唔頂得幾耐嘅咋，港產官僚如果仲未醒覺，出街畀黑雨淋醒自己啦。總而言之，快快諗計補鑊，防止災禍發生，如果唔係，你哋嘅政治災難隨時嚴重過黑雨蹂躪呀，叮！
