罪惡森林遍香江 危機四伏不勝防
尖沙咀重慶大廈被稱為重慶森林，皆因品流複雜，治安不靖，就好似遍布危機嘅森林一樣。日前發生內地女遊客被強姦案，震驚海外，唔止搞到重慶森林臭名遠播，連香港旅遊天堂招牌亦蒙污。
好嘞，重慶大廈爆出駭人罪案，警方賊過興兵，加強巡邏，問題係，咁係咪代表森林從此冇危機呢？係咪代表旅客從此平安大吉呢？當然唔係喇，理由好簡單，就算一座森林平安冇事，香港仲有好多森林危機四伏，咁樣治安點會改善吖？
嗱，本報繼揭發重慶大廈罪惡叢生，搞到區內人心惶惶之後，記者又巡視港九新界各區，發現類似重慶森林嘅「毒樓」遍布各區，好似尖沙咀香檳大廈、油麻地平安大樓、旺角新興大廈、灣仔富士大廈同元朗嘅色情四街咁，裏面龍蛇混雜，烏煙瘴氣，黃賭毒樣樣齊，有啲仲成為馳名中外嘅鳳樓集中地添，搞到風化案時有發生。先唔講呢類毒樓隱藏好多安全隱患，淨係受到蛇蟲鼠蟻百般滋擾，住客已經出入難安，棲身其中同置身危機滿布嘅野獸森林無乜分別嘅咋，叮！
講到呢度，太一叮諗起以前嘅九龍城寨。老一輩都知，九龍城寨三不管，正式係九反之地，裏面又係烏煙瘴氣生人勿近，又係黃賭毒騙亂七八糟，唔同嘅係，以前城寨得一個，家陣毒樓就遍布港九新界，咁搞法，香港治安又點會好吖。撇開旅遊業形象唔講，香港自詡國際都會，居然周街都係罪惡森林，就算旅客無畀嚇走，港府自己都丟架啦，吓話？
所以話，金玉其外，敗絮其中，香港表面上繁榮昌盛，實際上藏污納垢。無論點都好，當局必須嚴厲執法，除咗肅清重慶森林，亦要掃蕩各區毒樓，咁樣遊客至可以玩得開心，市民亦能夠住得開心。你知啦，治安黑點長期無人理，結果必然罪惡叢生，萬一又有遊客淪為禽獸獵物，香港淪為第二個印度，旅遊業招牌隨時保唔住o架，港產官僚到時至嚟補鑊就太遲嘞！
講到尾，香港之所以生滿毒樓，就係當局執法不嚴，變相縱容所致，情況就好似明知有蛇蟲鼠蟻都唔去滅蟲，治安不斷被蠶食，香港淪為罪惡之都唔係無可能o架，叮！
