花自飄零水自流,廿萬雙非,港人好愁。太一叮忽然大發詩興,皆因雙非問題後患無窮,北區小一學位不足問題未解決,又輪到中一學位爆「旱災」,你都咪話唔愁。

呢,教育局向立法會提交未來十年學生人口推算,受出生率低迷影響,全港中一適齡人口將由下學年嘅五萬七千幾人持續減少到一六/一七學年嘅不足五萬人,短期來講港府縮班減位嘅政策基本正確。不過跟住嗰幾年,適齡雙非兒童回流升中,又會令中一學生人數由谷底反彈,一直彈到二二/二三學年近七萬人,比一六/一七學年激增二萬幾人,當中重災區北區嘅增幅高達兩成七。雙非兒童來勢洶洶,學位荒由小學蔓延到中學,當局可以點解救呢?

見到咁嘅趨勢,本港教育界梗係緊張啦,梗係呼籲港府盡快建中學增學位啦,但問題係,以上數據純粹靠估,最後有幾多雙非兒童回流香港,連港府自己都講唔清,官員擘大個口得個窿,到底增加幾多學位先至夠呢?你知啦,教書育人唔同擺地攤,起學校冇三五年時間都好難成事,起得少又怕供不應求,一個唔覺意起多咗咯喎,結果難免又搞出個殺校減班大災難!

唉,太一叮環顧古今中外,學位供求大致上都係保持平穩,唯獨今日香港,竟然出現呢種冰火九重天嘅奇特現象,學位需求好似過山車咁大上大落,嚇到學校同家長心驚肉跳,教育局進退兩難,學位減又唔係,加又唔係,真係吹脹!

講到底,一切都係拜前特首曾蔭權爵士所賜。前朝貪曾政府對雙非孕婦中門大開,將雙非兒童視為紓緩人口老化嘅靈丹妙藥,結果未見其利、只見其弊,雙非兒童蜂擁回流,爭奪學位唔在講,將來仲可能爭職位、爭房屋、爭福利……乜都爭餐飽,香港勢陸沉,你話點收科,叮!

只要精神不滑坡,辦法總比困難多。港府估計,過往累積嘅雙非兒童總數約莫有二十萬人,只要港府同內地當局多加合作,充分掌握佢哋回流香港嘅意向,好多問題都係可以預先準備同解決嘅。可惜吖,香港官場生態十分特殊,同內地交流唔係解決中港關係實際問題,而係飲茅台送曲奇餅搞關係爭做政治花瓶。

一句到尾,貪曾政府害人害物,在任七年一事無成,全無建設,只有破壞,為香港留低數之不盡嘅爛攤子,雙非問題只係冰山一角,而學位短缺更係冰山一角嘅一角。事到如今,港府官員怨都無用o架喇,惟有面對現實,未雨綢繆,諗辦法收拾殘局啦。

第一手消息請下載on.cc東方互動iPhone/iPad/Android/Windows Phone Apps