民航處變電視城 官僚洗腳唔抹腳

呢個新電視城位於民航處總部，從大堂、各層走廊、升降機出入口，到人流冷清嘅航空教育徑，總共有六十六部電視機，其中一個巨無霸電視牆，連基座有一層半樓咁高，認真誇張。保守估計，淨係呢批電視已經使咗近六百萬元，仲未計廿幾位首長級高官辦公室嘅電視添吖，其中處長同副處長享用五十五吋大電視，真係豪氣沖天。

咁就奇喇，民航處嘅職責係管理航空交通，同電視台大纜都扯唔埋，點解要裝咁多電視機，而且有咁大裝咁大呢？尤其係處長同副處長辦公室，使唔使五十五吋大電視咁誇張呀？到底係工作需要，定係慷納稅人之慨，唔使太一叮講，相信大家都有答案喇。正如有立法會議員質疑，民航處總部變身電視城，有濫用公帑之嫌咯。

講到濫用公帑，咁都未算吖，民航處仲有一樣創舉，就係將新總部變身「大浴場」。呢，成幢大樓除咗處長獨享二百平方呎淋浴套廁外，另有廿五間淋浴室，數量遠高於其他政府部門。總而言之，喺呢座耗資二十億元興建嘅超級豪華總部做嘢，唔係睇電視，就係洗白白，寓工作於休閒，認真識歎。

除咗寓工作於休閒，仲可以寓工作於娛樂o架。本報早前揭發，民航處新總部有間美輪美奐嘅舞蹈室，佔地七百呎，名貴木地板加高級音響器材，三面牆身全部裝嵌鏡面並設芭蕾舞扶手。據講，設立舞蹈室係因為民航處處長羅崇文愛妻對跳舞情有獨鍾喎，反正公帑埋單，馬照跑舞照跳，使多多錢都無所謂喇。

正所謂見微知著，民航處高官揩油早已習以為常。處長早排被踢爆經常佔用位於金鐘道政府合署嘅民航處免費車位，泊自己嘅跑車同房車；仲周不時去香港飛行總會揸定翼機，費用就由公帑支付，你話唔係假公濟私都冇人信啦！

講嚟講去，高官洗腳唔抹腳，搞到官場烏煙瘴氣，都係因為其身不正嘅曾蔭權爵士帶壞頭。貪曾「貪遍省港澳，歎盡海陸空」，手下自然有樣學樣，久而久之咪搞成咁囉。計太一叮話齋，唔使「五十年不變」嘞，港產官僚迅速國產化，好快就一國一制嘅喇，叮！