眼睛係靈魂之窗，亦係人體最敏感嘅器官，一粒沙吹入眼都難忍，如果被人監生挖走眼珠，嗰份錐心之痛可想而知。嗱，大家咪以為講笑吖，內地真係發生兒童被活生生挖去雙眼嘅恐怖血案，簡直係慘絕人寰，不忍卒睹。

話說山西一名六歲男童喺屋外玩耍時被人擄走，到尋獲時已經滿面鮮血，一對眼球被監生挖走，經過三個多小時手術搶救之後，雖然檢回一命，但已確定永久失明，人生從此陷入黑暗。事件懷疑係器官販子所為，內地器官買賣猖獗，一對眼角膜嘅黑市價高達三十萬元人民幣。

你話係咪喪心病狂吖？器官販子居然為咗呢三十萬元，不惜向幼童下毒手，摧毀別人一生幸福，簡直泯滅人性，禽獸不如！稚子何辜，受害兒童仲未知道終身失明嘅殘酷事實，醒來後猛問點解世界變得咁黑嘅？係囉，太一叮都好想問一句，點解中國社會變得咁黑暗咁恐怖？點解有啲中國人變得咁兇殘咁歹毒？有人割取兒童器官賣錢，有人將兒童打成殘丐乞錢，有人用三聚氰胺毒害嬰兒，有人偷車時掐死車上嘅嬰兒……神州大地一片黑，就算逃得過黑心食物嘅荼毒，都遲早因為自相殘殺而亡國亡族啦！

所以話，中華民族到了最危險嘅時候，呢句國歌簡直係眼前嘅最真實寫照。成個中國道德淪喪，烏煙瘴氣，已經進入一個病態社會，百姓日常食嘅係黑心食物，飲嘅係污染毒水，吸嘅係致癌毒氣，依家兒童光天化日之下都可以喺家門前被擄走挖眼，咁嘅國度點生活呀？難為官老爺仲口口聲聲要打造中國夢喎，夢就係夢嘞，不過係發噩夢呀！

始終都係古人講得啱，上樑不正下樑歪。中國社會之所以變得咁殘酷咁可怕，皆因官老爺其身不正，佢哋荒淫無恥，見錢開眼，敗壞社會風氣，有人咪有樣學樣，為非作歹囉。文革被形容為中國最黑暗時期，其實當時受迫害嘅多數係官員，依家受苦受難嘅係基層百姓，所以話，今日中國比文革仲黑暗，簡直到咗民怨沸騰嘅地步，再咁落去，北大人亡國亡黨嘅預言好快噩夢成真嘅咋！

一句講晒，中華民族到了最危險嘅時候，亦到咗最缺德嘅時候。當一個人嘅心眼被金錢蒙蔽，佢嘅內心世界一定比挖去雙眼更加黑暗。有人話，來生不做中國人，其實計太一叮話齋，如果有得揀，今生就不要做中國人喇，叮！

第一手消息請下載on.cc東方互動iPhone/iPad/Android/Windows Phone Apps