公院散播惡菌 能醫不能自醫

最近有隻名為抗萬古霉素腸道鏈球菌嘅惡菌不斷傳播，聽個名已經夠可怕，原來傳染力仲可怕，首先喺伊利沙伯醫院爆發，好快就蔓延到七間公立醫院，淨係廣華醫院咋，七月份就錄得四十四名病人帶菌紀錄，而今年全港嘅帶菌人數更加創下超過五百人新高添，你都咪話唔得人驚。

公院究竟係醫人定害人o架？唔通好似武俠小說話齋，最安全嘅地方就係最危險嘅地方？醫院係治病救人嘅地方，依家居然淪為惡菌溫床，等於前廉政專員湯顯明帶頭貪婪，搞到廉署不廉，你話係咪荒謬吖？

醫管局點樣解釋呢？佢哋話喎，公院感染控制未盡完美，但否認由伊院播菌，又話為加強感染控制，今個月起將派出「臥底」突擊巡查醫護人員有冇做足潔手程序，若潔手比率不足七成將被評為肥佬。

嗱，呢啲咪叫不打自招囉，醫管局依家至派臥底巡查，即係變相承認過去監管不足，令公院變成播毒黑手，睇嚟宣傳廣告要改對白咯：「撳過升降機嘅陳醫生，打完乞嚏嘅張護士，仲有去完廁所嘅雜工明哥，雙手睇嚟乾淨，其實暗藏邋遢。唔洗手，難怪變晒傳染病嘅幕後黑手！」

所以話啫，今時今日嘅公院真係危機四伏o架，醫療事故無日無之，早已害人不淺o架啦，家陣仲變埋播菌大本營添，病人就算唔使做手術，一樣有可能被害到雞毛鴨血。喂，唔理醫管局點樣解釋，總之公院淪為播菌溫床係鐵一般嘅事實，呢隻鑊衞生官僚點都卸唔甩o架嘞！

講開又講，當局與其派臥底查前線醫護人員，不如派臥底查一查醫管局管理層就真。醫護人員講究衞生清潔係最基本要求，公院咁都做唔到，足以證明管理幾咁混亂啦。講到底，除咗前線醫護之外，醫療庸官一樣係傳染病幕後黑手，呢種傳染病叫集體瀆職症候群，再唔醫治嘅話，成個公營醫療系統遲早畀佢哋玩死嘅咋。

一句講晒，公院淪為播毒手，醫局管理病到嘔。周一嶽擔任食衞局局長期間，渾渾噩噩，搞到醫管局烏煙瘴氣，估唔到高永文接任之後，情況依然冇改善，唔通醫管局真係病入膏肓，已經冇得醫？叮！