江山易改，淫賤難移，有爛果報之稱嘅《蘋果日報》又作新聞喇，今次係將坊間傳聞當「重磅炸彈」，大肆宣揚，明屈一位內地前記者，令人嘆為觀止。
件事係咁嘅，爛果報日前頭版大字標題報道，聲稱內地前記者李建軍爆料，指多名中央高層支持華潤集團董事長宋林喎。事實又係點嘅呢？李建軍強調有關內容只係坊間傳聞，爛果報居然描述成由佢透露嘅「重磅炸彈」，擺明靠害，報道手法極不道德。為討回公道，李建軍繼前日到將軍澳爛果報總部外靜坐之後，尋日又公開宣讀譴責爛果報嘅聲明，怒斥該報極不負責任，為吸引眼球不惜歪曲、捏造事實，甚至對新聞當事人進行構陷，完全違背最起碼嘅新聞操作規範，踐踏新聞倫理道德，佢對此表示極度不滿與譴責，除咗會向新聞團體投訴，仲會保留一切法律追究權利。
最好笑嘅係，爛果報玩完老屈又玩龜縮。前日李建軍上門要求解釋，竟被拒於門外，搞到要喺門外靜坐抗議，爛果報仲派攝影記者不停拍照，都唔知究竟有乜意圖。爛果報敢做唔敢認，屈人食死貓，到依家連解釋都冇句，唔通佢哋自覺理虧冇面見人？
李建軍慨嘆，佢喺內地早就聽聞爛果報以小報式「八卦」手法報道，只為吸引讀者眼球，今次總算領教咗。其實，佢咪領教得少囉，講到老屈老作，爛果報認第二，冇人敢認第一，今次只係小兒科嘅咋。呢，前行政會議成員林奮強講過一句「我完全唔係歧視新移民」，結果被爛果報老屈成「我完全係歧視新移民」，仲要登喺頭版添，作新聞作到咁嘅地步，問你服未！
話時話，爛果報毫無新聞道德，譁眾取寵，謊話連篇，醜聞又點只咁少吖。遠嘅唔提，就講近日咋，失實報道一單接一單，鑊鑊新鮮鑊鑊甘。呢嗱，除咗李建軍上門譴責之外，有份發起撐警方集會嘅香港家長聯會會長李偲嫣亦向爛果報發出律師信，要求就連串對佢嘅抹黑及人身攻擊道歉。仲有吖，民間機構一國兩制研究中心亦發表聲明，指《壹週刊》日前針對該中心嘅報道嚴重失實，表示會轉交律師處理，追究責任。唉，上樑不正下樑歪，淫賤黎其身不正咯喎，佢旗下嘅爛果報及《壹週刊》又點可能唔爛鬥爛吖！
正如網民話齋，「一日一毒果，真相遠離我。」對付呢啲搬弄是非、顛倒黑白、唯恐天下不亂嘅淫賤傳媒，最好嘅辦法就係丟入堆填區，令佢哋永遠消失，反正堆填區就喺壹淫媒隔籬嘅咋，叮！
第一手消息請下載on.cc東方互動
