係人都知，好多免費報粗製濫造，濫竽充數，一派到手就畀人掟落垃圾桶，一變垃圾就畀人送入廢紙場，即派即棄即被回收，成為日常運作三部曲。諗唔到傳媒生態日新月異，今時今日免費報嘅傳播途徑更加便捷，都未派咋，已經直接送去廢紙場，免費變即廢，問你服未！

話說尋日凌晨五點幾，喺黃大仙竹園南邨麗園樓對開空地，一名《都市日報》派報男工鬼鬼祟祟將一疊《都市日報》偷龍轉鳳，由公司嘅派報貨車搬上一部流動回收廢紙貨車，後來被行家發現報警，隨即被捕。經初步調查，警方相信偷報男監守自盜，為咗一百六十元，偷走一千九百份《都市日報》當廢紙變賣。

一不離二，另一份即廢報……唔係，免費報《AM730》亦發生家賊事件喎。一名男派報司機偷報轉售被撞破，情急之下棄報而逃。經初步調查，呢位文賊打算將一千份《AM730》轉售廢紙回收公司。

唉，世上無免費午餐，公公婆婆周街執免費報轉賣，都叫做體力勞動吖，兩名偷報男連隨手派一派，跟手喺附近垃圾桶執番嘅簡單手續都懶得做，實在係罪有應得嘅。之不過咁，偷報男利欲熏心之下走上歧途，亦係唔難理解嘅，免費報良莠不齊，魚龍混雜，好多根本不值一哂，日日被人即取即棄，甚至有啲直頭未被人揭過就送入廢紙回收場添，家陣就算被人原封不動拎去轉售，都好易瞞天過海無人知。

講到呢度，大家終於明白啦，點解咁多免費報自吹自擂，呢個話自己印刷一百萬份，嗰個話自己印刷幾十萬份，簡直吹牛唔使本。先唔講印刷數量有冇水份，就算真嘅又點啫，報紙未派就直接送入回收場，或者被市民求其揭兩下就送入堆填區，就算印刷一千萬份，受惠嘅都唔係市民同廣告商，反而受累嘅係堆填區，受害嘅係自然生態！

講真，辦報唔係求數量，而係重質素，好似每逢星期五隨《太陽報》附送嘅《好報》咁，內容精彩，猛料如雲，市民爭崩頭，讀者猛叫好，咁就有麝自然香，唔使自吹自擂，一樣客似雲來啦。嗰啲重量唔重質嘅免費報未曾派發已回收，實在嚴重糟蹋地球資源，與其叫免費報，不如叫浪費報、垃圾報好過。

最後，太一叮想提醒大家，好有好報，惡有惡報，派報男變偷報男肯定有辱斯文，呢種糟蹋資源嘅行徑唔止對唔住地球先生，更加無顏面見人，好人好姐，有手有腳，無謂同公公婆婆爭飯食吖，係咪？叮！

第一手消息請下載on.cc東方互動iPhone/iPad/Android/Windows Phone Apps