廉潔指標創新低 上樑不正下樑歪

呢，港大最新調查顯示，受訪者對香港廉潔指標評分跌至一九九八年以來新低，平均只得六點三七分，證明香港嘅病係由內至外，已經爛透。唔使問阿貴，廉潔指標連環插水，完全拜前特首曾蔭權爵士等貪官所賜，貪曾其身不正，「貪遍省港澳，歎盡海陸空」，而被視為「曾兄弟」嘅前廉政專員湯顯明亦有樣學樣，大小便宜都貪。兩人被封「絕代雙貪，香港之恥」，可謂實至名歸。

上樑不正下樑歪，絕代雙貪禍港，貪腐病毒急速蔓延，大有大貪，小有小貪，淨係舊年咋，廉政公署就收到逾一千宗涉及政府部門嘅貪污投訴，比前年激增近一成。好事不出門，醜事傳千里，全球反腐組織「透明國際」舊年公布全球廉潔指數，香港排名下跌兩級，只能排於十四位，創下五年之低，被排名第五嘅新加坡遠遠拋離，足證雙貪惡行唔止激起港人公憤，而且臭名遠播佗衰家。

要制止貪腐病毒擴散，為香港廉政形象止蝕，重建核心價值，有乜辦法？好簡單啫，清理門戶囉。好可惜，廉署調查雙貪醜聞雷大雨小，拖到今時今日都未有下文，尤其係貪曾，查咗十幾個月仲係零交代，問你服未。連前刑事檢控專員江樂士都忍唔住質疑當局拖延調查及檢控，令人難以置信，勢必產生許多不幸結果。

正如有人話齋，廉政公署有必要改名「廉政私署」，「香港勝在有ICAC」嘅口號應該改為「香港敗在有貪曾同貪湯」，真係一啲都冇講錯。香港話就話實行一國兩制，其實再咁落去，香港官場遲早大陸化，兩制好快變一制嘅咋！

講到底，物必先腐而後蟲生。香港之所以出現今時今日嘅亂局，都係因為港府是非不辨，敵友不分。如果話旺角兩個陣營對罵係小事化大，咁廉署對破壞香港形象嘅雙貪放軟手腳，好明顯就係大事化小、官官相護。試諗吓，如果連廉政及法治呢個核心價值都保唔住，香港仲有乜優勢可言？同內地城市又有乜分別吖？

嗱，太一叮再次提醒港府，諱疾忌醫，禍患無窮，要清除貪腐病毒，重建廉潔形象，首先要切除貪曾、貪湯呢兩個大毒瘤，如果唔係，等到病毒上腦咯喎，咁就嗚呼哀哉嘅喇，叮！