政壇：七人車被撞CY避過意外
特首梁振英（CY）喺休假期間去咗遼寧千山風景區遊覽，遠離煩囂後返港搏殺，點知尋日首日復工，CY嘅AM 90七人車就遇上交通意外，好在當時佢唔喺車內，算係不幸中之大幸，否則一回港就成為新聞主角。
平日以有區徽座駕代步的CY ，落區時會坐AM90七人車。（資料圖片）
話說CY一向係坐有特區區徽車牌嘅特首專車出入，落區時不時以政府AM 90七人車代步，但尋日我哋收到風，喺早上約十時左右，AM 90七人車喺下亞厘畢道一帶遇到交通意外。特首辦發言人接受查詢時證實，該座駕於早上約十時駛回禮賓府閘口位時，遭到尾隨車輛撞到，事後已經將有關座駕停用並交予有關方面檢查。據悉當時CY、特首辦主任邱騰華等人都不在座駕之內。
還記得本月初，受囤地風波困擾嘅發展局局長陳茂波曾駕駛掛有「P牌」嘅車輛遇上交通意外，事後需送院接受檢查，呢次CY座駕同樣遇到交通意外，幸好CY非司機亦非乘客，相對而言算係比較幸運喇。
