政壇：搞搞政：陳維安啜核詞彙考傳譯
立法會聘用嘅手語同外語傳譯公司早前合約期滿要商討續約，立法會行政管理委員會為傳譯公司進行測試評估，立法會會議最常見嗌交，有啲發言要譯真係幾傷腦筋，究竟秘書長陳維安佢哋用乜嘢考人呢？其中兩條題據講係「我一估就估到史篤城，調轉嚟讀就係『成篤屎』」，「梁生，你滷味唔食食叉燒，敬酒唔飲飲罰酒就得o架嗱？」呢兩句話嘅傳譯難度真係唔細，但應試者結果順利過關，獲批再續約兩年。
設計圖片及對白
我哋請教過一啲對文化研究有認識嘅學者，佢話「一篤屎」嘅普通話可以傳譯為「一泡屎」，至於英文方面就可譯為「a piece of shit」。不過，網上亦有人認為，「a piece of shit」係侮辱用語，應譯為「廢人」或「賤人」；至於「一篤屎」嘅手語係點做，就比較難喺呢度形容出嚟，大家不妨留意吓立法會開會啲手語傳譯員點做。
除咗刁鑽發言外，議員因為唔可以喺會議上公然講粗口，但就有議員開創大玩諧音粗口，用普通話鬧班高薪厚祿嘅庸官很「不該」，搞到市民變成「poor guy」，亦隨時考起一眾專業傳譯員。據聞立法會秘書處轄下嘅翻譯及傳譯部，正計劃搜集過往議員嘅有趣發言，再製成一本詞彙集，以供傳譯員日後參考。
