政壇：梁粉肥仔變風頭躉
漫長暑假即將完結，隨着開學在即，教育界嘅風頭躉將陸續返校，除咗因爆粗辱警成為城中焦點嘅小學教師林慧思外，特首梁振英早前出席天水圍地區論壇時，喊完一句「支持梁振英」口號、跟住聲言被打嘅十一歲「肥仔」鄧同學都係好多人關注嘅焦點。
肥仔今年正式升讀中學，據聞佢尋日返學期間有唔少同學搵佢合照，其中一名與佢同校嘅學民思潮姓蔡同學，就好開心喺社交網站分享咗同肥仔嘅合照，仲留言話原來肥仔去咗佢間學校，梗係要同偶像影張相喎，而其他同學湧晒去搵肥仔影相添，仲話肥仔唔惡嘅時候好可愛喎，估唔到肥仔忽然變咗風頭躉。其實，被打事件後，有網民都起底話肥仔當時都有擲水樽。
