政壇：陸恭蕙首創「垃圾汁」
新界東北堆填區發生污水滲漏事故，環境部門被指隱瞞多時，事發之後，環境局亦反應遲緩，署理局長陸恭蕙尋日先露面回應事件，唔知陸恭蕙係要耍語言偽術，定係搞創意，尋日佢見記者時由頭到尾都大講「垃圾汁」，以此形容滲漏嘅污水。不過，市民有冇感覺良好就唔知，但環境保護署卻全不配合，尋日喺回應事件嘅跟進行動新聞稿中，通篇都係用「污水滲漏」形容事件，陸恭蕙今次真係孤掌難鳴囉！
設計圖片及對白
方國珊「越區」踩多腳
污水滲漏事件被踢爆多日，當局環境高官一直隱形，拖到尋日，陸恭蕙終於現身，自然被人追問環境局高官點解遲遲唔回應，僅由助理署長現身？更有傳媒直問「你本人在哪裏？」官場經驗唔豐富嘅陸恭蕙話晒都有多年嘅議會經驗，完全無視呢條問題，話最重要二十三日當局知道滲漏嘅係「垃圾汁」。跟住佢又話，嚟緊周日環保署官員會陪同立法會議員視察新界東北堆填區，似乎呢一日嘅落區騷，環境當局都淨係派署方官員參加咋。
陸恭蕙創新嘅「垃圾汁」解釋，地區人士有乜睇法呢？似乎冇乜好感噃。有人就話，污水就係污水，高官整個「垃圾汁」嘅字眼出嚟，係咪表示垃圾汁唔同污水呢？定係垃圾水比污水乾淨呢？或者啲高官應該解釋吓垃圾汁同污水成分有咩唔同。最好笑嘅係，環境局嘅轄下部門環保署卻同頂頭上司冇乜溝通，同日回應事件，話到明呢次係「香港首宗堆填區滲濾污水滲漏事件」，擺到明同陸恭蕙打對台。
件事另一個弔詭處係，一向喺將軍澳區反對堆填區擴建嘅西貢區議員方國珊尋日同幾個支持者向陸恭蕙示威，行動仲快過新界東北嘅關注團體，真係踩住風火輪咁款喎。
