政壇：小吉着錯裙拒跪低
為期五日嘅國際青少年繪畫比賽尋日喺尖沙咀文化中心煞科，壓軸環節係由八十名來自世界各地嘅小畫家及逾千名市民，攜手畫出長達千米嘅「全球最長填色畫」，籌委會主席方黃吉雯（小吉）、青年事務委員會主席陳振彬、中華電力企業發展總裁莊偉茵（Quince）見證呢個成功刷新健力士世界紀錄嘅創舉，不過尋日嘅活動上，小吉卻兩度尷尬。
方黃吉雯（中）着裙唔方便踎低，惟有搵身邊嘅金髮美少女（左二）代勞。
怕走光搵美少女代勞
一向衣着得體、有品味嘅小吉尋日竟然「老貓燒鬚」，佢身穿一條粉紅色及膝連身裙主持「開筆禮」，點知活動司儀卻示意一眾嘉賓跪喺地上，為超長畫布率先髹上色彩。在場咁多位嘉賓都係着褲，隨即輕鬆單膝跪下，唯獨着裙嘅小吉不知所措，撳住條裙想踎低又怕走光，掙扎咗幾分鐘後，最終為保儀態都係堅持企喺度，將油掃交畀身旁嘅外籍少女代勞。咁都未算，小吉致詞時都有啲緊張，將支持單位之一嘅「國泰城」講錯「泰國城」。
民政事務局署理局長許曉暉（Florence）同比賽大使「天才小畫家」劉見之，即係青少年兒童畫家培育基金創辦人劉浩昌嘅囝囝同一組，見之出晒名有繪畫天分，佢睇到Florence拎住把油掃、望住幅畫不知從何入手，於是從旁提示，Florence欣然虛心「受教」。
