政壇：阿基賀母百歲宴政界捧場
立法會議員馮檢基（阿基）個媽咪下周一百歲生日，佢尋日就喺旺角筵開四十多圍提早幫媽媽慶祝，連同佢即將離港到英國就讀舞台設計嘅兒子馮本一，三代同堂齊齊向馮媽媽祝壽，場面認真熱鬧。對於今次馮媽媽嘅生日賀壽，其實阿基一早做好準備，佢自言早於八、九個月前已同媽咪講定要搞生日。雖然馮媽媽坐住輪椅出席壽宴，但眼仔睩睩，認真精神奕奕，阿基等人又按家中傳統送上手鐲、戒指、耳環向媽咪祝壽。
張建宗（右二）向馮檢基媽媽賀壽。
張建宗畀面出席
此外，阿基亦獲政界中人到場捧場，其中同聲同氣嘅泛民主派當然空群而出，包括民主黨主席劉慧卿、職工盟李卓人等人，建制派則有旅遊界議員姚思榮赴會。至於政府官員方面，據聞阿基曾邀請多個問責局長出席，但最後只有勞工及福利局局長張建宗（小肥張）現身，不過小肥張話晒係阿基嘅對口單位，加上雙方都極之關注貧窮同長者問題，其中都算係情理之中嘅安排喇。
