女嬰抽搐腦受損 醫院疏忽圖卸責

話說賴女士今年二月初喺東區醫院開刀分娩，女嬰出世第二日就出現半邊身抽搐，而且持續咗兩日，點知醫護人員竟然指情況正常，唔使擔心喎。直至第三日情況唔只冇改善，而且連面部都抽搐，院方至急急補鑊，可惜為時已晚，女嬰確診係缺氧引致左腦受損，腦細胞無咗三分之二，頭比同齡嬰兒細，日後除咗活動能力可能遲緩之外，智力發展亦可能受到影響。

兒科專家指出，嬰兒抽搐絕對唔正常，一分鐘都嫌多，隨時導致呼吸困難同加重腦缺氧情況，嚴重嘅甚至可能導致死亡。嗱，女嬰出世第二日就持續抽搐，稍有醫學常識嘅人都知有問題喇，而院方仲聲稱情況正常，你話係咪不負責任吖！

初為人母嘅喜悅畀突如其來嘅打擊摧毀，賴女士質疑醫院疏忽治理，既冇察覺女嬰抽搐同腦缺氧有關，亦冇及時搶救。而院方就憑一句事故原因不明，企圖將責任推得一乾二淨，話就話會跟進事件，睇怕又係虛應故事，不了了之。

講到疏忽，簡直係公立醫院嘅專利。呢，醫管局前日公布瑪嘉烈醫院護士拔喉後病人死亡個案調查結果，事故起因係兩名資深護士使用無創傷性呼吸輔助器面罩嗰陣，低估病人拔喉轉床可能出現嘅風險，簡單啲講即係判斷出錯，最終奪走一條無辜生命。唔講唔知，原來涉事護士已經復工，所謂懲處只不過係接受內部調查，純屬掩人耳目。

醫管局處理事故高高舉起，輕輕放下，唔怪得公立醫院醫療醜聞愈來愈多喇。呢嗱，好似前幾個月嗰宗「換錯心」烏龍鬧劇咁，病人去世後捐出心臟遺愛人間，點知負責器官移植嘅醫生直到手術尾聲至發現接受器官嘅病人血型唔啱。多得幸運之神眷顧，呢次跨血型換心暫時冇搞出人命，但涉事醫院除咗道歉同表示「跟進」，其他乜都冇做。

嬰兒抽搐當冇事，搞錯血型換錯心，公立醫院鑊鑊新鮮鑊鑊甘，問題癥結係醫管局管理混亂，醫療高官冇心冇肺冇靈魂。計太一叮話齋，本港公營醫療病入膏肓，再唔動大手術，好快玩完嘅咋，叮！