窮人數字步步高 皆因港府拒安老

呢，社聯根據政府統計處數字分析，發現上年貧窮人口達一百一十六萬一千人，比前年增加一萬人，貧窮率維持百分之十七點一。其中在職貧窮達到十九萬一千戶，亦比前年回升六千戶。社聯係咁講嘅，貧窮人口嘅升幅主要來自長者，長者貧窮率高達百分之三十二點六，即係三個老人一個窮，反映長者貧窮問題日趨嚴重；至於在職貧窮問題惡化，估計同最低工資效應消退有關喎。

你話係咪閉翳吖，最低工資本來係保障基層打工仔，點知實施之後貧窮人口不減反增，究竟出咗乜嘢問題，港府係咪應該好好研究吓呢？仲有吖，長者貧窮愈嚟愈嚴重，已經成為窮人大軍中流砥柱，咁先至大鑊。係人都知，隨住人口不斷老化，貧窮人口只會不斷增加，到時香港唔止係國際金融中心，仲隨時成為國際窮人中心添，你話醜唔醜怪吖？

為免金融中心變窮人中心，社聯建議設立低收入補貼，協助需要供養子女嘅低收入家庭喎。即係咁，補貼唔係話無得諗，起碼可以幫清貧家庭暫時止吓咳，之不過咁，長貧難顧呀，最怕補貼措施到喉唔到肺，好似港府派糖咁，又好似跨區工作交通津貼咁，治標不治本，結果咪一樣無「補」於事！

所以話，解決貧窮問題必須對症下藥。既然貧窮人口升幅主要來自長者，治本之道梗係搞好安老政策先啦。嗱，推行全民退休保障制度，畀市民老有所依，老有所養，起碼唔會有咁多貧窮長者。如果港府繼續闊佬懶理，貧困長者繼續無依無靠，退休後一係手停口停，一係靠執紙皮餬口，連基本溫飽都成問題，香港貧窮人口唔升爆燈至奇啦。

講到底，一切都係前朝煲呔曾政府種下嘅禍根。香港屬於富裕地區，港府財力雄厚，安老本來唔成問題，弊在港府又孤寒又唔肯承擔，一直漠視老人貧窮問題，搞到基層長者叫天不應，叫地不靈，有乜辦法唔淒涼吖。嗱，財政司司長曾俊華啱啱畀人鬧完「大罪人」，應該係時候反省吓喇，你就可以尸位素餐揼波鐘啫，好多老人家唔等得，快快推動全民退休保障計劃，畀基層長者過番啲有尊嚴嘅生活，如果唔係，萬一香港真係變成國際窮人中心，你就真係名副其實嘅大罪人喇，叮！