毒奶粉冰山一角 懶官僚把關渾噩
北大人講過，吃飯權係中國最重要嘅人權。按照呢種邏輯，飲奶權肯定就係嬰孩最重要嘅人權嘞。可惜吖，今時今日國產奶粉唔可靠，連外國奶粉一樣靠唔住，你話邊個可以保障嬰兒嘅飲奶權呢？
嗱，最近發生嘅毒奶風波唔係講玩o架，出事嘅新西蘭恒天然集團係全球最大乳製品出口商，原材料被驗出含有肉毒桿菌，而本港有售嘅牛欄牌同可瑞康兩隻牌子部分奶粉懷疑受污染，數十萬罐奶粉下架，多名兒童報稱中招，出現發燒、乏力等徵狀。唉，可憐天下父母心，嬰兒食不安心，大人點可能唔擔心吖？
更令人擔心嘅係，毒奶粉影響範圍未明，出事牌子仲有冇其他批次奶粉受污染，仲有冇其他牌子奶粉中招，全部一無所知，令人防不勝防。嗱，藥劑業專家係咁講嘅，受污染奶粉嘅數量及批次難以估計，擔心目前公布受影響品牌只屬冰山一角，已經去信多間主要品牌代理商要求交代，並提供安全測試證明。
唔知大家點諗，太一叮就覺得問題好大。雖然話有奶便是娘，但係毒奶粉危機四伏，小寶寶食不安心，出來保嬰衞奶嘅居然唔係官老爺，而係醫學界，港產官僚去晒邊呢？當然，港產官僚都唔係完全無反應嘅，只係嚴重遲鈍啫，食物安全中心話喎，乳類食物繁多，下游追蹤有如大海撈針，不符合成本效益，所以目前唔會全面化驗咁話。點知話口未完，眼見毒奶粉風波持續惡化，佢哋又改口稱會全面抽查新西蘭製造嘅一歲以下嬰兒奶類產品喎。
聽完呢番官腔，大家係咪更加擔心呢？太一叮有時懷疑，港產官僚係咪飲得太多毒奶粉，所以渾渾噩噩，做嘢都慢幾拍。
講到底，港產官僚對毒奶風波輕描淡寫，真正原因唔係不符合成本效益，只係不符合苟且偷懶嘅官僚利益啫。○八年內地刮起三聚氰胺毒奶風暴，港產官僚初時亦係闊佬懶理，後來見唔對路至肯做嘢，結果唔止驗出牛奶受牽連，仲連雪條及餅乾都驗出有問題添。一句講晒，唔見棺材唔流淚，次次都要搞出大鑊嘢，港產官僚先至識驚，呢啲咪叫死性不改囉。
唉，好心港府生性啲啦，家陣香港已經民怨四起，亂象叢生，如果搞到連嬰兒都冇啖好食咯喎，怒火中燒嘅父母隨時推住嬰兒車上街抗議都似，叮！
