公屋入伙百事憂 安居樂業打折扣

啟德發展區首個公共屋邨啟晴邨，延遲咗兩個月終於入伙，新住戶左等右等終於有個竇，梗係開心到暈喇。之不過，如果你以為呢個前國家領導人到訪過嘅屋邨，一定會住得開心，住得放心，咁就大錯特錯喇。盛名之下，其實難副，估唔到喬遷之日，竟然係噩夢嘅開始。

有政黨調查發現，對外交通不便，商場街市欠奉呢啲問題，令啟晴邨新住戶十分頭赤。七成受訪者擔心交通配套不足，目前屋邨只得三條巴士線接駁九龍、紅磡同旺角，港鐵站要步行十到二十分鐘至去到，一到上落班繁忙時間，墟冚程度可想而知。亦有住戶投訴購物唔方便，屋邨冇街市，而商場超市最快要下個月至開業，買條菜、買舊肉都要步行十幾分鐘，去到彩虹至搞得掂。

政府口口聲聲盡快解決房屋問題，縮短輪候上樓時間，周圍搵地大興土木增建公屋。點知屋就起好咗，但配套設施跟唔上，搞到劣評如潮，好事變壞事。

市民要嘅係衣食住行樣樣方便齊全嘅家，唔係僅僅有四道牆包住嘅石屎箱。收樓發現樓宇質量問題多多，住落又諸多不便，叫人哋點安居吖？返工返學，輪候巴士打晒蛇餅，叫人點樂業吖？叮！

講開又講，近年喺啟晴邨之前落成使用嘅多個公共屋苑，新住戶普遍面對社區配套設施尚未完工，日常生活基本需要依賴鄰近地區設施等問題困擾。太一叮諗極都唔明，點解政府唔可以提早一年半載為配套服務招標，等公共服務可以同居民同步入伙，等佢哋盡快適應新環境，投入新社區？有幾難啫？港產官僚唔係唔知點做，而係根本唔想做。

講到配套不全，不得不提同樣位於啟德發展區，牛步興建，姍姍來遲，一啟用就玩殘旅客，失禮香港嘅啟德郵輪碼頭。位置喺冇雷公咁遠，但交通配套設施乏善可陳，基本上只靠私營穿梭巴士往返碼頭及部分旅遊景點，旅客叫苦連天。拖來拖去起咗幾年，碼頭附近到依家仲係個大地盤，旅客進港第一印象就係塊爛泥地，香港乜架都丟清光喇。

回歸之後政府蹉跎歲月十幾年，施政議而不決，辦事甩甩漏漏，連公屋配套呢家嘢都做得唔湯唔水，仲話要穩中求變，適度有為添，呃鬼食豆腐咩，叮！