科研投資太落後 急功近利冇前途

嗱，英國泰晤士高等教育機構公布全球學術創新指標，按照企業對各地科研學者投資列出全球三十強，其中躋身前十強嘅，一半屬於亞洲國家及地區。佢哋嘅排名如下，南韓第一位，新加坡第二位，台灣第六位，中國第七位……咦，香港去咗邊呢？唉，講出來就羞家咯，香港遠遠墮後喺第二十位，排名仲低過印度呀，該煨！

香港假假地都係亞洲四小龍之一，家陣亞洲科研投資領先世界，香港居然落後食塵，失威都係事小，失競爭力大件事吖嘛。商人逐利，投資只問回報，不問其他，企業對香港科研嘅投入遠遠低過其他亞洲地區，說明香港科研產業前景遠遠落後於人，而且仲係大墮後嗰隻添，唔驚就假。

點解企業對香港科研興趣缺缺呢？鬼咩，港府自己都唔嗲唔吊，科研資助雞碎咁多，企業又點會睇好香港科研產業吖？呢個係有雞先定有雞蛋先嘅問題，正如港府民望愈低殘，愈得唔到市民信任，施政就愈舉步維艱，於是咪愈民望低殘囉。所以話，本地科研競爭力每況愈下，始作俑者就係港府。

更何況，香港經濟畸形發展，一味炒樓炒股，科研產業無肉食，企業投資自然捨香港而去啦。講真，如果科研產業前景無限，企業會有錢唔賺？問題係香港科研產業無市場，投資大，回報期長，仲隨時血本無歸添，唔使借助高端計算機，識打算盤嘅都知條數點計啦，吓話？

一句講晒啦，港府目光短淺，根本無為科研產業製造良好土壤，於是搞到香港競爭力遠遠落後周邊地區！

叮佢個鎯鎯，港府一直唔認本港經濟結構單薄，一個科研投資排名榜就證明佢哋自欺欺人。廿一世紀係科技時代，科研領域唔止主宰軍事戰場，亦都主宰經濟戰場，亞洲四小龍之中，南韓科研產業如日方中唔在講，新加坡同台灣亦根基雄厚，唯獨香港仲喺度發夢，一味炒樓炒股，塘水滾塘魚，再咁落去，香港競爭力唔畀拋離九條街至奇。

最令人擔心嘅係，樓市陰晴不定，股市又疲不能興，家陣連個人遊虛火都因香港承受力爆煲而降溫，萬一又嚟金融風暴，香港咪食西北風？

港產官僚，唔好再瞌眼瞓喇，快啲諗計振興科研產業，如果香港下次排名跌到影都冇，唔該你哋都一齊自動消失喇，叮！