建屋無計靠捐地 官僚無能太可悲
好咯，日盼夜盼，終於盼到有地建屋，無殼蝸牛有望有瓦遮頭咯！咪住，會唔會搞錯o架，港產官僚囤地自肥就叻啫，搵地建屋不嬲束手無策，點解忽然咁神勇呢？無搞錯，因為今次有地建屋，唔係港產官僚嘅本事，而係有富商捐出農地咋。
呢位捐地富商咪就係恒基地產主席李兆基囉。四叔打算捐出一塊元朗農地畀房協興建一千個細單位，有關商討已經進入尾聲，目前只剩下補地價問題未解決，相信好快就有定案。佢仲話，希望政府可以補一半地價，令經濟並不寬裕嘅市民有機會上車。
講起今次四叔捐地，都算好事多磨咯，本來諗住捐出七塊新界農地畀政府，點知食咗大檸檬，兜咗一個大圈，家陣卒之有房協接手，空置農地總算有用武之地。你知啦，香港房屋供應長期短缺，無殼蝸牛望樓興嘆，依家有人捐地咯喎，無論點講都係好事，希望今次唔好再淪為空中樓閣啦。
講開又講，政府無能，搞到要靠富商捐地建屋，唔知大家點諗，太一叮就覺得好可悲囉。港府作為全港最大地主，居然搵唔到地建屋，講出去都醜死人啦。唔通港府無農地咩？如果郊野農地可以成為建屋安民嘅伊甸園，點解港府一直呻無地可用呢？香港幾多人貧無立錐之地，港府坐困愁城，一味識問「地從何來」，講起上嚟，何止可悲，簡直可恥！
再講吖，房屋問題積重難返，尾大不掉，單靠富商捐出幾塊農地，根本無濟於事。唔講其他，劏房居民就有十幾萬人，今次捐地計劃就算能夠興建一千個細單位，連杯水車薪都講唔上啦。仲有呀，富商捐地，房協建屋，投入嘅基礎建設耗資巨大，隨時妹仔大過主人婆，公帑係咪用得其所亦係好大問題。
講到底，房屋問題搞成咁，皆因港府無能。如果港產官僚強政勵治，坐言起行，要闢地建屋有幾難吖，使乜搞到要人捐地施捨咁肉酸。嗱嗱嗱，咪畀太一叮睇死，發展局局長陳茂波捲入囤地醜聞，政治助理何建宗又被揭漏報利益而辭職，喺咁嘅惡劣形勢之下，新界東北發展計劃隨時又係無疾而終嘅咋。如果大型發展計劃又跪低，無殼蝸牛想安居樂業，可能仲難過滄海變桑田呀，叮！
