患者雲來實篤數 庸官管理常失禁

公院呢筆新混帳來自專治大小便失禁嘅東華醫院理遺護理診所。本報接獲該院內部投訴，踢爆有人喺今年二月密集式舉辦兩次職員講座，話幫護理人員增進護理理遺病人知識喎，仲要求參加者提供身份證號碼簽到添，你話奇唔奇吖？最離奇嘅係，呢批為數近百人嘅出席人士一日之間變晒「失禁病人」，資料出現喺登記診症系統上面，受牽連者包括東院行政總監余詩思、護理部、行政部、藥劑部、社工部同採購部等等。簡單啲講，即係成間醫院由上而下都有「病」！

嗱，呢單公院職員集體大小便失禁事件真係疑點重重o架。講座內容係教授點樣照顧失禁病人，關採購部同社工部職員乜嘢事呢？兩次講座內容一樣，點解部分護理人員聽完又聽呢？唔通東院職員真係得閒成咁？仲有呀，其中一名「病人」、東院門診部註冊護士預約睇症，但係根據更表，佢當時應該正在當值，點解能夠分身睇症呢？仲要睇症登記時間喺下午，上午電腦已經有診症護理紀錄，你話離唔離奇吖？你話其中冇蠱惑，講都無人信啦。

東院搞出呢筆大混帳，咪就係醫管局資源錯配嘅遺禍囉。理遺護理診所每年服務目標為四千人次，懷疑有人擔心未達標，所以篤數製造虛假需求，意圖避過削減資助。公院為咗爭奪資源不擇手段，管理混亂固然成問題，但最大問題係浪費資源，明明冇咁多病人，多餘嘅資源去咗邊呢？醫療資源被糟蹋，等如其他公院資源捉襟見肘，受害嘅始終係病人嘅咋！

大家終於明白啦，政府醫療開支年年增加，但係公院依然年年呻資源唔夠，服務質素每況愈下，關鍵就係醫管局管理不善，資源錯配。好明顯，醫療庸官患有集體管理失禁問題，所以搞到公院亂象叢生，一褲都係。有公院醫生透露，類似篤數事件唔係首次o架嘞，曾經聽聞有醫護人員刻意舉辦培訓課程同社區講座嚟儲病人，博騙取更多資源。

嗱，爆出篤數醜聞之後，醫管局急急補鑊，話有關指控嚴重，會成立小組深入調查喎。希望醫療官僚今次唔係又口部失禁，噏得就噏啦，醫療資源關乎病人福祉，唔該你哋快快撥亂反正，清理番呢筆蘇州屎吖，叮！