大球場百孔千瘡 換草皮不如換官
香港大球場變香港大農場，爛地一片害到外國勁旅來港比賽「鬼食泥」，所以有人批評，呢塊大泥地簡直係港府施政一塌糊塗嘅寫照。好嘞，大爛地獻醜大半個月，官老爺補鑊未呢？唉，鑊係有補，不過補到唔三唔四，拖泥帶水嗰隻。
係咁嘅，大球場千瘡百孔，康文署話準備明年重鋪草皮喎，仲話打算引進新品種草皮添，現時已經喺大球場部分地方以試驗性質種植兩種百慕達草，遲啲會根據專家意見作出選擇咁話。本來呢，遲到好過冇到，補鑊好過唔補鑊，重鋪草皮不失為修補呢片管治瘌痢頭嘅其中一塊藥水膠布。問題係，大球場不堪一擊，成因唔止草皮劣質咁簡單，而係裏裏外外層層爛透，如果只係重鋪草皮，咁同做表面文章有乜分別？
正如草皮專家話齋，大球場現時種植嘅草其實唔係唔好，只係管理不善啫；要搞番掂個場，若然唔改良排水系統同泥層，就算鋪幾好嘅草皮都係嘥氣嘅咋。
無錯嘞，大球場輕易被雨水浸到蓉蓉爛爛，草皮生瘌痢只係表徵，當年設計出錯導致排水系統阻塞至係元兇。如果大球場只係更換草皮，唔改善排水系統，即係換湯不換藥，治標唔治本，日後一旦再遇罕見豪雨，容乜易又變大農場大爛地o架？容乜易又成國際笑話o架？到時又點？係咪再換一次草皮蒙混過關呀？
唉，港府不愧係一個金玉其外，敗絮其中嘅爛球場，施政唔係踏踏實實，勤勤懇懇，一味有姿勢冇實際，做埋啲表面文章。既然排水系統係大球場死因，港產官僚仲等乜呢？點解仲慢條斯理呢？唔通獻醜一次仲唔夠衰，係要躀多一鋪至知醜？
話時話，康文署處事怠慢，太一叮都唔覺得奇怪咯。大球場草地問題存在咗十幾年，如果有心整，早就整好啦，使乜搞到今日畀人笑到面黃？更離譜嘅係，大球場爛地醜聞爆出初期，康文署居然踢都唔郁，卸膊話天氣因素無法控制喎，到後來群情洶湧，先至知衰幫手運送沙粒填氹，點知又被踢爆沙粒混雜玻璃碎同貝殼，令大球場贏得「殺人球場」稱號，你話係咪恥辱吖？
一句到尾，大球場唔止草皮爛，更加管理爛，唔將懶散官僚連根拔起，港府呢塊爛球場都係繼續一塌糊塗。唔好再拖泥帶水嘞，重修大球場絕對唔能夠重鋪草皮就草草了事，喂，康文署署長馮程淑儀，如果閣下塊面生滿毒瘡，都唔會淨係貼塊膠布就算啦，係咪？叮！
