調查貪曾拖又拖 難怪頻頻惹怒火

呢，律政司前任刑事檢控專員江樂士又睇唔過眼喇，佢繼早前致函東方報業集團質疑當局拖延調查曾蔭權爵士貪腐案之後，尋日再次來信要求當局盡快交代。佢係咁講嘅，廉政公署舊年二月接手調查貪曾案，依家過咗十八個月仲係無聲無息，調查進度如何，究竟會唔會檢控，律政司一直零交代，實在令人難以置信。

又難怪江樂士質疑嘅，貪曾案一拖再拖，無聲無息，係人都覺得有問題喇。嗱，當局調查多宗涉及其他高官權貴嘅案件，包括前政務司司長唐英年僭建案、前行會成員林奮強涉偷步賣樓案、另一名前行會成員張震遠捲入商交所案，都可以喺三個月至十二個月內完成調查，並決定是否作出檢控；就算當年調查財政司司長梁錦松涉偷步買車事件，亦唔使一年時間。唯獨對於貪曾案嘅調查好似慢動作咁，如果話當中冇蠱惑，細路仔都唔信喇。

最令人莫名其妙嘅係，廉署舊年延長行動處處長李銘澤任期三個月，理由就係為咗調查貪曾，家陣李銘澤已經退休十三個月；而負責此案嘅律政司現任刑事檢控專員薛偉成亦將於下月八日退休，調查依然石沉大海，你話係咪不合情理吖？

不妨聽吓當局點樣解釋。律政司現任刑事檢控專員薛偉成否認拖延調查，仲反指江樂士唔清楚案件詳情同調查進度，佢暗示貪曾案涉及境外調查，可能涵蓋澳門同深圳等地方，所以需要多啲時間處理喎。事實究竟係咪咁，大家聽住先喇。

講開又講，江樂士咁着緊貪曾案，接連提出質疑，雖然義正詞嚴啫，但始終令人覺得有啲怪怪哋。其實五十步笑一百步，佢做官嘅時候亦係其身不正嘅咋，正如好多退休高官咁，在位嘅時候渾渾噩噩，得過且過，一到退休咯喎，即時扮晒正義，成日出嚟指指點點，說三道四。所謂一日唔偷雞就做保長，咪就係指呢啲人囉。內地經常畀人批評老人干政，原來香港都係差唔多，高官在其位不謀其政，不在其位亂謀其政，唔怪得香港烏煙瘴氣喇！

總而言之，醜媳婦終須見家翁，貪曾案再咁拖落去，遲早拖死香港法治嘅咋，叮！