庸官早走早着 免得夜長夢多
好消息好消息，本報收到獨家好消息，消災防火無方、打壓新聞自由有計嘅消防處處長陳楚鑫將會提前執包袱！事實再次證明，眾怒難犯，眾意難違，消防庸官提早滾蛋，港府提早揼低一件負資產，對提升低沉嘅民望多少有啲幫助。
不過，又唔好高興得太早住。事關呢位仁兄猶抱琵琶半遮面，雖然提前鬆人自我了斷，但隨時拖到下年六月咁話。正所謂，早走早着，遲走瞓唔着，夜長夢多，撞板多過食飯嘅陳楚鑫繼續尸位素餐成年咁耐，唔知仲會搞出幾多大頭佛。
講開陳楚鑫嘅臭史，真係三日三夜都數唔完。喺佢嘅荒唐管理下，近年消防處一塌糊塗、亂象叢生，應做嘅唔做，唔應做嘅亂做，姑且唔提佢滋擾傳媒機構打壓新聞自由嗰筆，亦唔講佢浪費公帑買埋啲唔啱用嘅消防設備，甚至連消防宿舍帶頭違反消防法例、總部泵房違例改成洗衫房都唔算，淨講最近爆出嗰單「機場真空」事件呀，人流如鯽嘅香港國際機場被揭經常調走所有駐守救護車，大剌剌擺咗六年空城計，一旦發生緊急事故，後果不堪設想，兩任消防處長對問題視而不見，搵人命較飛，你話係咪混帳吖，叮！
管理不善都未算，陳楚鑫又被記者直擊佢其身不正，當街煲煙兼亂過馬路。喂，三歲細路仔都識唱啦：「交通規則要遵守，安全第一命長久。」堂堂消防處一哥知法犯法，一邊亂過馬路，一邊吞雲吐霧，一邊違反交通規則，一邊破壞消防英雄形象，影衰香港，直頭係佗衰家嗰隻！
唉，陳楚鑫嘅劣迹罄竹難書，醜聞日日新鮮，爆發頻率直追「一周一鑊」嘅前食衞局局長周一鑊，蛻變成楚楚可憐嘅「陳七鑊」。如果話，帶頭腐敗嘅前廉政專員湯顯明係香港廉政最大敵人，咁身為消防之首嘅陳楚鑫周圍點起火頭，好明顯就係消防處嘅最大毒瘤。佢嘅所作所為唔止激起公憤，連老天爺都睇唔過眼，早前萬魚跳上中區滅火輪碼頭，尖沙咀消防總部大樓亦遭祝融光顧，你都咪話唔得人驚。
即係咁，天意示警，不得不察，如果陳楚鑫尚有一絲愧疚之心，下台謝罪唔使等到下年咁耐，走得快好世界呀嘛。一來市民安心，二來有助打救港府江河日下嘅民望，至於佢本人咯喎，到時無官一身輕，相信當街煲煙都冇人理，利己利人，何樂而不為？不過，亂過馬路呢種陋習都係勸你快啲戒咗佢啦，唔係上得山多終遇虎，馬路車多又快，因住呀，叮！
