扶貧會淪包租公 無殼蝸牛眼光光

件事係咁嘅，扶貧委員會一個小組建議推出「包租公」計劃，將政府及私人物業嘅空置單位，以低於市價租畀輪候緊公屋嘅年輕人。扶貧會化身包租公，聽落的確幾有「創意」，問題係究竟可以搵到幾多單位呢？能唔能夠解決燃眉之急呢？

講起真係得啖笑，當局大鑼大鼓宣揚一番，原來到依家為止，只係搵到約一百個單位咁大把，你話係咪搞笑吖？相對於公屋輪候冊入面十一萬名非長者單身人士，正一買糖唔夠甜，買鹽唔夠鹹，連杯水車薪都講唔上。想上樓？簡直仲難過中六合彩。

冇計喇，呢個跛腳政府講就天下無敵，做就有心無力，增加房屋供應一味大隻講，到依家仲係束手無策，寸步難行，咪惟有靠呢啲小打小鬧嘅動作虛應故事，敷衍市民囉！

現屆政府上台嗰陣拍心口話要全力解決房屋問題，結果覓地無能，拓土無方，除咗開空頭支票乜都做唔到，樓價短短一年內再飆升兩成，等到頸都長仲上唔到樓嘅無殼蝸牛愈來愈多。借用巴士阿叔金句，你有壓力，我有壓力，問題「未解決」吖！

雖然話房屋問題係前朝貪曾政府遺留落嚟，積重難返，唔係三兩年工夫可以解決，但唔等於現屆政府可以翹埋雙手，乜都唔做等運到。土地政策係點樣，房屋問題點解決，如何縮短公屋輪候時間，當局根本冇一套完整嘅計劃，一味得過且過，市民急佢哋唔急，簡直不知所謂。

最離譜就係，政府坐擁金山銀山，盈餘豐厚，庫房水浸，唔計外匯儲備，淨係財政儲備都有七千億元咁多，肥到着唔到襪咁滯，可惜港府一味做守財奴，就算不情不願派錢，亦派到亂晒龍，搞到愈扶愈貧。嗱，過去幾年幾乎年年派糖，計計埋埋已經派咗二、三千億元，但到頭來得個吉，政府民望愈跌愈低，民怨愈積愈深。正如富商話齋，財政司司長曾俊華理財不善，應使不使，簡直係香港「大罪人」。

講起鬍鬚曾，真係火都嚟埋。呢個「史上最廢財爺」孤寒成性，連派粒糖都不情不願，長者生活津貼要申報資產，全民退休保障諸多推搪，話佢係「大罪人」，一啲都冇冤枉佢o架。

始終都係呢句，畫餅容易充飢難。旨意呢個眼高手低、一味吹水而且醜聞不絕嘅跛腳政府兌現「基層上樓，中產置業」承諾，根本就係緣木求魚，叮！