飛機作為其中一種最快捷嘅交通工具，今時今日功能好多o架，衝上雲霄嘅神聖任務除咗作為旅客運送工具，仲隨時變作利益輸送工具添。呢，八名立法會議員及一名行政會議成員接受航空公司款待，攜帶家眷免費把臂同遊法國數日，唔止機票住宿全部免費，行程仲包括巴黎及南部城市多個名勝景點，「咁遊法」，話係公幹喎，大家信唔信吖？

嗱，錯就要認，打就要企定。呢班「玩法」團友受盡千夫所指之後，呢兩日終於頂唔住公眾壓力，逐一認衰補鑊，有人將旅費捐出，有人公開道歉，有人承諾以後自費行程，總之，跪低方式不同，求饒姿態一樣啦。即係咁，公職人員瀆職醜聞曝光，認錯係基本動作，至少代表願意接受監察吖嘛。哈，點知偏偏就係有人目中無人，至今依然砌詞狡辯，死不悔改，你話係咪禮義廉吖！

呢位仁兄就係行政會議成員鄭耀棠。佢尋日首度開腔回應醜聞，話款待團已經維持咗好幾年，佢以前都去過，所以唔覺得有問題，更加唔覺得自己有違規，所以無打算捐出相關款項咁話。

喂喂喂，鄭耀棠係咪喺法國玩到心花怒放，所以講嘢唔經大腦，語無倫次呀？打劫殺人夠係自盤古初開已經存在啦，唔通又係無問題咩？對就係對，錯就係錯，以前犯錯，今日再犯，結論唔係代表你身家清白，只係代表你死性不改咋，叮！

鄭耀棠嘅情節比其他人嚴重，唔止因為佢死不知錯，更因為佢係行會成員。多名議員證實，行程中航空公司代表曾經談及廉價航空公司發牌等行業發展問題，而鄭耀棠身處嘅港府最高決策核心行政會議，正正負責拍板有關政策，如果咁都唔算利益衝突，點至算利益衝突？向來以賴皮出名嘅垃圾會議員都紛紛認錯啦，鄭耀棠反而死不認錯，唔通權力大啲真係惡啲，定係權力大啲可以厚顏啲呀？

不過話時話，鄭耀棠作為港府一員，佢對接受財團款待甘之如飴，太一叮絕對唔覺得出奇囉。大家聽得多啦，近朱者赤，近墨者黑，前特首曾蔭權爵士身敗名裂，其中一個污點就係接受富豪款待，鬼鬼祟祟坐私人飛機暢遊外地，鄭耀棠接受財團款待，坐飛機暢遊法國，可能都係想有樣學樣，有福同享啫。係喎，貪曾貪腐案嘅調查聽聞已經接近尾聲，更多不為人知嘅貪腐情節隨時愈揭愈多，到時鄭耀棠又可以學嘢嘞喂，叮！

第一手消息請下載on.cc東方互動iPhone/iPad/Android/Windows Phone Apps