港產官僚靠得住 點會無端又冧樹

件事係咁嘅，有幾位市民發揚愛心，颱風翌日自發到荃灣光板田村做義工，幫手清理廟宇。點知好心冇好報，無端端飛來橫禍，一棵蕉樹突然倒冧，再壓倒旁邊一棵枯死嘅橡樹，兩棵樹好似骨牌咁冧落嚟，一名男義工走避不及，畀樹幹擊中，當場爆頭，血流披面，畀同伴救出送院，目前依然危殆。

地政總署證實，冧樹位置屬政府土地，估計係樹幹基部枯萎引致倒塌。樹木辦例牌賊過興兵，事後急急派人到場檢查樹木。唉，遲唔遲啲吖!

所以話，港產官僚最叻就係補鑊，如果地政總署能夠吸取教訓，平時巡查驗樹畀多啲心機；如果樹木辦能夠做好本分，護樹工作做得細緻啲，枯樹又點可能變成殺人兇器吖？塌樹殺人嘅悲劇又點可能不斷發生吖？

舊年十月之嘛，一名南亞裔男子喺大埔坐友人駕駛嘅貨車，路邊一棵十五米高嘅百年細葉榕突然倒塌，壓扁貨車駕駛室，呢名南亞裔男子當場被壓死。事隔僅僅十個月，今次又發生塌樹傷人意外，港產官僚究竟點樣護樹？正如有立法會議員批評，當局重複犯錯，未有吸取教訓，係罔顧市民安危，政府應當盡快主動檢查靠近路邊嘅大樹。亦有環保團體促請當局檢討目前驗樹機制，主動檢查鄉郊樹木。

話時話吖，如果港產官僚係負責任嘅，一早就會加強巡查，一早就會發現問題喇，枯樹又點會話冧就冧吖。

大家一定記得，○八年有位港大女生喺赤柱畀路邊一棵倒冧嘅百年刺桐古樹壓死，全城怒插港府部門失職。當局事後急急補鑊，又煞有介事成立樹木辦，話就話要統籌政府各個部門管理同檢查樹木，弊在又係大隻講，樹木辦官員糧照出，樹照冧，浪費公帑，一事無成，簡直係多隻香爐多隻鬼。

始終都係俗語講得啱，官僚靠得住，豬乸會上樹。旨意港產官僚護木喎，只會死得人多嘅咋。無計喇，呢班官老爺渾渾噩噩，做邊樣衰邊樣，佢哋嘅「正業」，就係不務正業，消防處係咁，樹木辦亦係咁，香港遲早畀佢哋玩死，叮！