道歉虛情假意 菲國欺善怕惡

嗱，如果想補鑊嘅話，慳番都得嘞。菲律賓政府處理人質事件疏忽無能，害到八名港人無辜枉死，一句遲來嘅道歉有咩用吖，一句假惺惺嘅道歉又有咩意義吖。冇錯，菲律賓的確欠香港人一個公道，不過最應該出嚟道歉嘅人唔係馬尼拉市長，而係嗰位嬉皮笑臉嘅三世祖總統囉。三年嘞，八位死得不明不白嘅港人至今沉冤未雪，菲律賓政府仍然唔肯道歉，唔肯賠償，依家單憑馬尼拉市長幾句說話就想一筆勾銷？非常抱歉，無可能囉。

即係咁，人質慘劇之後，菲律賓特蠢部隊成為懦弱無能嘅代名詞，三世祖變咗恬不知恥嘅象徵，諗唔到原來菲律賓仲係一個欺善怕惡嘅國家。台灣一位漁民被殺，菲政府三個月就腳軟跪低，又書面道歉，又承諾賠償；香港八名旅客枉死，菲政府態度傲慢，拖足三年都唔肯還港人一個公道，即係明恰香港啫。正如遇難者家屬話齋，埃斯特拉達嘅道歉一啲誠意都冇，絕對唔會收貨，一於企硬向菲國索償，討回公道。

其實，菲國高官嘅道歉何只無誠意，直頭虛情假意啦。最好笑嘅係，佢哋早前仲扮失憶，問香港點解遲遲唔解除對菲律賓嘅黑色旅遊警示喎。真係唔知假懵定真傻，一個完全漠視旅客安全嘅落後地區，梗係生人勿近啦，世界上咁多地方，點解一定要去菲律賓？點解要花錢買難受？

講來講去，都係因為中國政府軟弱。香港居民喺外地遇害，北大人唔只無盡責任為港人追討公道，反而以德報怨，卑躬屈膝討好菲律賓三世祖總統。呢，前年人質慘劇發生後一年，北京居然邀請三世祖訪華，奉為上賓不特止，仲送上幾十億美元大禮添，你話係咪等於喺港人傷口撒鹽吖？你話係咪自取其辱吖？係呢，聽聞三世祖下月將會再次訪華，今次唔知又會收到幾多禮物？

所以話啫，香港回歸十六年，人心漸行漸遠，唔係無原因o架。一個對外敵軟弱，對人民強硬嘅政權，點會得人心吖？港府仲話等阿爺打救喎，睇嚟慳番啖氣都得嘞，人質慘劇三周年，阿爺同賓賓互送秋波，港人睇見都眼火爆喇，叮！