單車徑設計戇居 運輸署製造意外

話說上水火車站附近有一條新運路單車徑，經常人車爭路，險象環生，原因係隔籬行人路設計失誤，路面太窄，行人摩肩接踵無路可走，惟有鋌而走險取道單車徑。嗱，佔用單車徑真係一種危險行為嚟o架，一來兩個轆左穿右插，血肉之軀隨時被撞到血肉模糊，二來咯喎，市民擅闖單車徑有可能被檢控，荷包分分鐘大出血！

唔講唔知，原來根據法例，行人不按交通標誌使用單車徑係違法行為，最高可被罰款二千大元。喂，運輸署將條行人路整到咁窄，咪即係官逼民「犯」，逼市民犯法？好荒謬啫，吓話？

其實，以新運路嘅混帳設計，就算居民知道佔用單車徑犯法，一樣被迫走上違法之路。事關單車徑嘅設計非常霸道，其中一段直頭將行人路同連接火車站嘅行人天橋分隔，但係中間又無任何行人過路設施喎，居民唔橫越單車徑，唔通識飛咩？

一句講晒，運輸官僚簡直戇居！

行人流量有迹可尋，路面設計有「積」可循，為乜搞出一條陷行人於險境嘅羊腸小徑呢？單車徑係方便居民以單車代步，通行無阻，為乜到頭來會變成居民出入嘅攔路虎呢？有單車客投訴，單車徑已經變成行人路，行人亦埋怨，怕被單車撞傷。港產官僚施政無心無肺，激化人民內部矛盾，係咪嫌香港未夠亂先？

唉，如果話大球場變大爛地係港府管治一塌糊塗嘅寫照，咁單車徑變行人徑都算係運輸署施政混亂嘅縮影咯。嗱，運輸署設行人路唔對路，設計行人輔助線一樣搞到黐晒線，行人過馬路居然無交通燈號可依，搞到險象環生，意外頻仍，過去三年造成四十二宗交通意外，釀成五十人受傷。你話嘞，喺運輸官僚嘅戇居管理之下，路上零意外嘅口號有乜可能實現吖？

叮佢個鎯鎯，港產官僚連一條小小行人路都搞唔掂，做到烏厘單刀錯漏百出，試問點可能將香港管治好吖？

歷史告訴我哋，人民無路行，當權者一樣無運行嘅咋。如果港府繼續施政混亂顢頇無能，下場遲早好似嗰條被單車徑隔開嘅行人路咁，走上末路嘅咋，叮！