廉署早已政治化 退休高官講是非

呢嗱，話口未完，又有辦大家睇嘞。今次比較特別嘅係，亂噏其政嘅人唔係過氣政客，而係過氣高官，此人乃前副廉政專員兼執行處首長李銘澤是也。佢喺報章撰文，話特首梁振英要求向廉署投訴前行政會議成員林奮強嘅人道歉，係令廉署不必要地政治化，令人感覺不安喎；佢仲含沙射影指政府官員過往甚少主動將問題政治化，佢對廉署喺今次事件中被當權者用作政治工具，深感遺憾咁話。

李銘澤除咗炮轟港府，仲將槍口對準廉署添，指廉署對連串事件噤若寒蟬，令人感覺已經跟隨當權者靠邊站，如果屬實，十分可悲喎。唉，俗語話反轉豬肚，有人一離開官場就指手畫腳，說三道四，何止令人可悲，簡直令人可笑添吖。

來說是非者，便是是非人。李銘澤自己都識講啦，政府官員甚少主動將問題政治化，因乜解究你又挑動爭端，主動將問題政治化呢？尤其你係前廉署執行處揸弗人，一個咁敏感嘅部門，一個咁敏感嘅職位，離職之後唔識避嫌，反而挑撥離間，煽風點火，如果人人學你，何只政治化，天下大亂都似！

退一步講吖，李銘澤如果言之成理，仲情有可原，問題係佢昧於事實，亂噏廿四，簡直九唔搭八。稍有政治常識嘅人都知啦，由港英年代開始，廉署不嬲都係政治化，不嬲都係當權者嘅政治工具，點解李銘澤做官嗰陣唔出聲，依家先至嚟扮正義呢？嗱，呢啲咪叫偽善囉，呢啲咪叫唯恐天下不亂囉。

咁講啦，姑且不論當權者有冇令廉署政治化，李銘澤令廉署政治化就肯定嘅嘞。身為前廉署高官，居然反戈一擊，亂咁發炮，簡直係居心叵測，套用佢嗰句，實在令人覺得不安囉。

正所謂，相請不如偶遇，難得李銘澤自動送上門，太一叮想問佢，前特首曾蔭權爵士貪腐案件喺佢任內發生，喺佢任內立案調查，因乜事幹查到無晒下文呢？大家清楚記得，李銘澤喺一一年同一二年獲「曾朋友」前廉政專員湯顯明兩度延長任期，結果貪曾案如泥牛入海，貪官逍遙法外，李銘澤查案不力，唔只令廉署政治化，仲打爛廉署金漆招牌添，呢樣至真正令人深表遺憾呀，叮！