生態赤字爆晒燈 浪費資源官有責

尋日係「地球透支日」，世界自然基金會香港分會公布《香港生態足印報告》，顯示港人平均消耗嘅能源及糧食等資源，超出香港可承載量一百五十倍，導致「生態赤字」高踞全球第九位，亞洲排名第二，問你怕未。正如基金會話齋，如果世界上所有人都以港人模式生活，需要多兩個半地球至足夠，都咪話唔得人驚！

即係咁，香港係經濟發達城市，物質豐富，浪費資源一啲都唔出奇，但因為嚴重透支地球資源而搞到臭名遠播，咁就真係丟晒架。呢嗱，香港人均垃圾量每日高達二點六七公斤，冠絕全球，全港每日產生嘅廚餘更高達三千六百公噸，亦係世界之最。大家不妨撫心自問，自己有冇浪費食物？有冇亂咁購物？有冇破壞環境？

好彩，隨着環保意識不斷提高，港人逐漸醒覺，明白珍惜地球資源嘅重要性，好多市民都能夠自動自覺加入環保行列。弊就弊在港府無所作為，環保講多過做，有姿勢冇實際。就以最近推出「桌上零廚餘」運動為例吖，係就係口號多多，可惜全無配套，房屋署轄下十八個街市及六個熟食檔無任何廚餘回收設施，而食環署轄下一百零二個街市更只得一部廚餘堆肥機咁大把，所謂「桌上零廚餘」，純粹得啖笑。

講到底，最浪費資源、最唔環保嘅其實就係港產官僚。禮賓府射燈長開，淪為最嘥電官邸；太空館燈火長明，光度比國際標準高一千倍。唔怪得港產官僚被稱為「氣候逃犯」喇，佢哋改善空氣質素無計，處理垃圾唔掂，源頭減廢大隻講，本身仲帶頭浪費資源，香港想唔烏煙瘴氣都幾難喇。嗱，三個堆填區就快爆滿，擴建計劃跪低，興建焚化爐又遙遙無期，咁搞法，香港遲早變成垃圾港o架咋。

一句到尾，保護地球，人人有責。香港人唔係唔想搞好環保，唔係唔想做個負責任嘅地球公民，問題係港產官僚實在太廢，環保一事無成，導致香港臭名遠播，除咗空氣質素令人望而卻步，仲成為浪費地球資源嘅重犯添。計太一叮話齋，香港要減少生態赤字，首先要減少廢官，咁先至有望洗脫污名，叮！