市民私隱當垃圾 消防庸官要問責

嗱，話口未完，消防處又爆出歷來最嚴重資料外洩事件！一名助理區長喺屋企離奇「丟棄」私人手提電腦之前，冇刪除儲存嘅消防處內部文件同敏感資料，結果電腦輾轉落到收買佬手中，收買佬打開電腦赫然發現入面有大量消防處內部文件，即時報警求助。

消防處今年四月底接到警方通報，先至如夢初醒。據講外洩文件共有八百份，涉及一千九百名市民、消防及其他政府人員，部分仲有身份證、干犯消防條例詳情等敏感個人私隱添，你話係咪大鑊吖。

消防處高層亦知道大鑊，聽聞即時下令有關人等「封口」，企圖防止醜聞曝光。又難怪佢哋咁緊張嘅，根據內部指引，消防處屬員唔可以私下喺屋企處理及儲存公務文件；而政府《保安規例》亦訂明，保密文件未經批准不得從辦事處取走，或者帶返屋企。涉事助理區長固然有違規之嫌，而消防處高層監管失職，同樣難辭其咎！

話時話，消防處洩密早就唔係新聞喇。○九年「Foxy」天王曾經透過分享軟件成功搜尋到消防處六十份限閱及機密文件；今年三月荃灣救護站又丟失白車出勤紀錄，涉及一百六十名傷病者嘅個人資料。今次好彩有市民主動報警，萬一呢批個人資料流咗出街，變成不法之徒偷呃拐騙嘅作案工具，呢隻鑊試問消防處處長陳楚鑫孭唔孭得起吖！

消防處保護市民私隱不力，但侵犯市民私隱就從不間斷。本報舊年踢爆處方計劃喺部分消防車同救護車加裝天眼，引起輿論嘩然，計劃一度被迫叫停，點知消防官僚擇惡固執，前排居然靜靜雞試行計劃，仲打算喺近千架消防車同救護車安裝合共四千幾個鏡頭，通街走通街影，市民仲有乜私隱可言？

香港話就話有保障個人私隱嘅條例，仲專門設立咗私隱專員公署添，可惜虛有其名，得個睇字。呢，本報日前踢爆內地多個網站透過地下渠道取得本港或內地網購單據，套取收貨人姓名、地址等個人資料，然後再賤賣出去，而私隱專員公署居然矇查查，唔怪得畀人稱為冇牙老虎喇。

最離譜就係，消防處漠視市民私隱不特止，仲公然踐踏新聞自由，打壓正義傳媒，單憑一封無厘頭嘅電郵投訴就勞師動眾派人踩上報館，簡直居心叵測。咪話太一叮唔提醒消防庸官，眾怒難犯吖，如果再係咁不斷爆醜聞，市民一定唔放過你哋o架，叮！