學府淪搵銀私竇 教育必墮落下流
教育向錢看，辦學利當頭。今時今日，高等學府被稱為學店，唔係冇原因，呢嗱嗱嗱，又有大學爆出醜聞喇，今次唔止變成管理層嘅搖錢樹，仲淪為學生嘅搵錢私竇添，問你服未！
呢間搵銀學店咪就係浸會大學囉，佢哋間教學及行政大樓上年九月先至啟用，轉吓眼已經淪為舉辦私人牟利興趣班大本營。嗱，大樓三樓有六個學生活動室，點知變咗商業活動室，被浸大舊生佔用開辦皮革手藝班，而且透過社交網站招客，課程學費由百幾蚊至八百幾蚊不等，估計日賺逾千元。本報記者實地直擊，以街外人身份報讀，發現同班七名「學生」不乏其他院校學生，甚至有中六應屆畢業生，堪稱因財施教，有錢無類。
咁都得？學府淪為學店，被人利用開舖搵錢，唔通呢啲就係前特首曾蔭權爵士所講嘅教育產業化？咪玩啦，書香校園變銅臭私店，絕對係有辱斯文o架。唔好忘記，大學受公帑資助，校內資源被一小撮人利用作搵銀工具，明顯係損公肥私嘅違紀行為。如果浸大咁都隻眼開隻眼閉，不妨通知聲呀，等太一叮都嚟開班授徒收錢教人，淨係慳番租金同燈油火蠟都已經夠和味啦！
太一叮有時懷疑，浸大個「浸」字係咪寓意辦學宗旨以掠水為先。早前之嘛，浸大吳多泰博士國際中心至被揭涉嫌違反地契，將宿舍房間租畀「街客」長達九年，地政處後知後覺發信警告。事隔唔夠一個月，浸大又被揭發保安管理出現漏洞，院校地方被公然進行牟利商業活動，咁搞法，香港有冇條件做區內教育樞紐唔知，不過浸大肯定夠資格成為學界醜聞中心。
當然啦，大學管理亂過亂世佳人，學府變學店又點止浸大吖。理工大學上年亦被踢爆課室變私人教室，揭發有日語教師睇準理大課室無上鎖嘅漏洞，每逢周末「長駐」理大開班授徒，無本生利。
唉，大學唔係自己偷偷摸摸違規謀私，就係舊生偷雞摸狗假公濟私；大學課室唔係被利用作牟利興趣班，就係作私人教室。大學管理有幾亂七八糟，一眼睇晒。咁講啦，象牙之塔一旦淪搵銀私竇，教育必然墮落下流，如果連育人之地都禮崩樂壞，香港真係唔知會淪落成點咯。
講開又講，大學校園烏煙瘴氣，紛紛化公為私舔盡公帑，性質同貪曾貪湯運用公職享受貪腐一樣嘅咋。如果官老爺要敕令大學加強管理，自己係咪亦要以身作則，嚴懲貪官，肅清歪風呢？叮！
