炒完奶粉炒藥物 神州之病無得醫

內地官媒踢爆，最近愈來愈多內地民眾專程來港搶購藥物，成為繼炒賣奶粉同日用品之後，另一股炒賣新浪潮。嗱，西環一間藥房老闆係咁講嘅，每日營業額有近半來自內地客。而銅鑼灣等旺區嘅藥房仲勁，內地客比例唔只一半添。你話嘞，炒完奶粉炒藥物，小小香港遲早被踩沉，中港矛盾點會唔愈演愈烈吖？

因乜事內地同胞千里迢迢南下採藥呢？咪就係內地貪官靠害，醫療制度陋弊所賜囉。內地官媒聲稱，內地藥物缺乏完善監管，價格被瘋狂推高，人民唔想捱貴藥，咪惟有嚟港購藥囉。以治乳腺癌藥物為例，同一款藥喺香港賣一萬五千元人民幣，內地就賣二萬四千五百元人民幣，兩者相差成萬元，想唔嚟香港搶購都唔得喇。

即係咁，醫病要食藥，診治中國呢個高藥價頑疾更加要對症下藥。無錯，內地進口藥物貴到嚇死人，缺乏監管固然係問題，但歸根究柢，官商勾結至係禍首。呢，近期內地爆出多宗跨國藥企行賄醜聞，就係顯著病徵啦，呢類藥企為咗搶佔市場，不擇手段，有啲高薪招攬太子黨，有啲賄賂官員同醫生，羊毛出自羊身上，佢哋將行賄當成本，藥物價格唔高到黐晒線至奇啦。

叮佢個鎯鎯，難為官老爺仲有面自稱人民政府，佢哋全心全意為人民幣服務，幾時有為人民福祉着想過吖？中國人以前被人叫「黃禍」已經係奇恥大辱，今日被人叫「蝗禍」更加係無地自容，一個號稱崛起嘅堂堂大國，人民居然連奶粉、藥物同日用品都要跑到香港甚至外國搶購，到處被人歧視，「人民弊政府」知唔知醜o架！

話時話，今時今日做中國人，真係幾可悲o架，日常食嘅係毒物，飲嘅係毒水，呼吸嘅係毒氣，家陣連有病都買唔起藥，睇嚟唔使幾耐，炎黃子孫唔止要化身李時珍，仲要化身神農氏，人人上山採藥，以百草醫病，如果山草藥冇被污染嘅話。

唉，全國山河一片污，神州官員個個貪。睇嚟中國嘅高藥價問題都係冇得醫o架嘞，正如中國嘅貪腐風氣冇得整治一樣，只能夠繼續爛落去。係呢，早排內地人來港搶奶粉令本地嬰兒面臨缺奶，港府被迫推出限奶令，遲啲會唔會推出限藥令呢？叮！