豬價飆升必有因 港人遲早食無肉

豬肉價加咗幾多？犀利咯，連續四個月不停咁加，現時批發價每擔最高賣到一千五百七十蚊，創半年新高。肉商歸咎入口商不斷減少內地活豬供港數量，令價格上升，警告短期內若供應量仍然緊張，零售豬肉有加價壓力，甚至唔排除會罷市添，你話係咪弊傢伙吖？一個人中年發福踢走豬腩肉就話好事啫，萬一搞到全城食無肉咯喎，好大件事。

唔使講肉販威脅罷市吖，就講豬肉價飆升，都足以影響民生啦。係人都知，豬肉係大部分市民不可或缺嘅日常食品，一旦豬肉加價，影響千家萬戶，以後市民一係被迫捱貴豬，一係被迫食無豬，一句講晒，就係無啖好食！

俗語話，高官靠得住，豬乸會上樹，家陣豬肉價起勢咁上，你估高官靠唔靠得住吖嗱？食物及衞生局局長高永文話喎，活豬供應量及拍賣價同上年相若，現時三個代理商已存在競爭，並無發現個別供應商減少供應，而當局會繼續採取各種方法，確保食物供應充足，以及研究提高價格透明度咁話。

唉，廢話即係廢話，講咗等於冇講。如果活豬供應量無少到，又無人囤豬居奇聯手抬價，點解批發價係咁飆升呢？如果市場一切運作正常，點解販商質疑有人聯手抬價推高豬價呢？唔通佢哋得閒到有生意唔做，出嚟亂咁砌人生豬肉？嗱，如果官老爺睇住市民任人魚肉都闊佬懶理，「施政為民」嘅口號摺得啦！

咁啦，如果高官人頭豬腦昧於形勢，等太一叮提醒你哋，香港樓價飆升，市民安居樂業嘅美夢已經愈來愈遙遠，如果再因豬肉價飆升而搞到連食啖安樂茶飯都可遇不可求嘅話，唔使等到七一上街o架，滿腔民怨隨時喺街市肉枱大爆發！

咁講啦，豬肉價格從來唔止係經濟問題，仲係社會及政治問題。所謂碗中有肉，心中滿足，幾年前內地豬價急升，搞到民怨沸騰，中央政府寢食難安，急急推出連串政策平抑豬價，證明此事非同小可。

堂堂天朝都唔敢看輕小小豬肉，港產官僚面對豬價問題居然唔嗲唔吊，食咗成擔豬油咁款，真係講都無人信。有人戲稱內地居民消費指數（CPI）係「中國豬肉指數」（China Pig Index），不如香港都搞個「高官豬腦指數」，睇吓佢哋處理豬肉問題嘅豬玀程度係咪高到爆燈吖，叮！