堆填區連環滲漏 環保署長期穿窿

大家可能會話，呢啲已經係舊聞啦，打鼓嶺堆填區出現污水滲漏，搞到區內河道同流合「污」，已經「臭」名遠播啦。嗱，打鼓嶺堆填區影響生態環境固然係舊聞，不過太一叮講緊嘅係新界西堆填區，換言之，發生污水滲漏嘅堆填區唔止一個吖！

件事係咁嘅，本報去年七月獨家踢爆元朗下白泥村對開嘅后海灣有大量貝殼類海產離奇死亡，海產腐爛發出惡臭，村民懷疑係垃圾堆填區滲漏污染環境，要求環保署徹查，點知當局接獲投訴之後扮晒魚蝦蟹，既無向村民交代，又無向公眾匯報，調查不了了之，直頭當乜事都冇。直到近日爆出打鼓嶺堆填區污水滲漏醜聞，環保官僚先至承認曾經考慮對堆填區承辦商作出檢控，最後因為證據不足而撤銷檢控喎，即係間接承認新界西堆填區滲漏污水，摧毀生態。

你話呢啲垃圾官僚係咪應該送入堆填區吖？打鼓嶺堆填區污水滲漏瞞得就瞞，新界西堆填區污水滲漏拖得就拖，佢哋究竟係保護環境定破壞環境呀？究竟係服務市民定靠害市民呀？堆填區污水係垃圾壓縮後嘅有毒物質，先唔講呢啲物質會危害環境及市民健康，淨係氣味又腥又臭已經夠困擾居民啦，港產官僚咁都可以闊佬懶理，關人個關，簡直豈有此理！

一不離二，二不離三。事實證明，堆填區一而再爆出污水滲漏醜聞，禍源就係環保當局監管不力。一個堆填區滲漏就話可能係意外啫，兩個堆填區出事就係設施有問題，當局後知後覺已經離譜，知道之後居然蓄意隱瞞，既唔採取補救措施，又唔及時通知市民防範，一錯再錯，冥頑不靈，難怪村民對當局表現感到憤怒喇。

開講有話，一節見而百節知。港府連污水滲漏都搞唔掂，點搞擴建堆填區呀？好話唔好聽，依家嘅堆填區甩甩漏漏，問題多多，擴建之後規模更大，滲漏更多，咁咪即係對生態破壞更大，對居民禍害更深？所以話啫，市民反對擴建堆填區唔係冇理由，港府落得寸步難行嘅局面，可以講係咎由自取，與人無尤，鬼叫自己無能兼無良咩。

總而言之，環保高官唔好再匿喺污水池嘞，快快出嚟畀公眾一個合理交代，快快諗辦法補救，須知堆填區污水滲漏可大可小，愈想隱瞞，愈容易穿煲嘅咋，叮！